A precariedade no emprego impide chegar a fin de mes a máis da metade dos fogares

No primeiro trimestre de 2024 máis da metade dos fogares galegos chega con dificultade ou moita dificultade a fin de mes, segundo a enquisa conxuntural que deu a coñecer esta terza feira o Instituto Galego de Estatística (IGE). En concreto, as porcentaxes indican que 45,05% dos fogares chega con facilidade ou moita facilidade a fin de mes, 45,04% con dificultade e 9,91% restante con moita dificultade, polo que suma destes últimos sería 54,95%. Na comparativa mensual con respecto a febreiro os datos melloran (aumenta 1,09 puntos no primeiro e diminúen 0,02 e 1,06 puntos no segundo e terceiro, respectivamente). Porén, con respecto ao primeiro trimestre de 2023, a porcentaxe de fogares que chega con facilidade ou moita facilidade a fin de mes diminúe 1,06 puntos porcentuais. A porcentaxe de fogares que chega con dificultade a fin de mes, pola súa parte, diminúe 1,16 puntos entre ambos períodos e a porcentaxe de fogares que chega con moita dificultade crece 2,22 puntos. Por tamaño de poboación, os fogares con máis dificultades para acabar o mes están nos concellos de entre 10.000 e 20.000 habitantes, onde representan 60% das familias. Pola contra, son naqueles concellos con máis de 50.000 habitantes onde se dá a maior porcentaxe de familias que rematan o mes con facilidade ou moita facilidade (47,5%). En canto a tipoloxía do fogar, 68% das familias monoparentais acaban con dificultade o mes, o que acontece con 64% dos fogares unipersoais. Máis marcas brancas e menos aforro En relación ás medidas económicas tomadas polos fogares nos últimos tres meses, 18,65% recoñece que non se permitiu ningún extra nos tres últimos meses. Neste contexto estarían os gastos destinados a vacacións ou viaxes, facer fronte a imprevistos ou grandes compras. Ademais tampouco tiveron posibilidade de consumir nada máis alá do habitual en alimentación, roupa ou calzado, contratar novos servizos para o fogar ou saír a cear. Tamén se inclúe nesta categoría poder aforrar e traballar menos horas ou que algún membro do fogar se permitira deixar de traballar. Sobre alimentación, 31,27% dos fogares galegos cambiou os seus hábitos de compra mercando marcas brancas e produtos en oferta no primeiro trimestre de 2024. Esta foi a medida económica máis habitual empregada polos fogares para reducir os gastos, aumentar os ingresos ou afrontar pagos neste período. De cara aos tres próximos meses, só 36,08% dos fogares pensa aforrar algo nos próximos tres meses, 41,08% facer algún extra en produtos de alimentación, 67,97% saír a cear, a cafetarías, ir ao cine ou ao teatro e 18,15% facer fronte a imprevistos ou grandes compras. Por último, a enquisa do IGE sinala que 16,17% dos fogares galegos está pagando a vivenda principal na que habitan, 9,60% o coche e 3,29% unha segunda vivenda. Con respecto ao mesmo trimestre de 2023, diminuíu 1,44 puntos a porcentaxe de fogares que están a pagar a súa vivenda habitual. As pensións xa son a principal fonte de renda en 93 concellos Servizos e Semana Santa Tamén esta terza feira, o Servizo Público de Emprego Estatal (SEPE) deu a coñecer os datos de desemprego. O informe indica que en marzo de 2023 houbo 1.572 persoas menos nesta situación, en comparación con febreiro (-1,2%), a mesma porcentaxe que a nivel estatal no mesmo período. Na comparativa interanual hai 12.836 persoas paradas menos que en marzo de 2023 (-9,05%). Porén, tamén se constata que do total de persoas desempregadas, 57,6% son mulleres e 4,1% menores de 25 anos. Por sectores, o groso das persoas paradas, 91.790, pertencen a servizos que diminuíron en 1.510 en marzo. Na industria hai 12.729 persoas desempregadas, caendo en 56. Tamén na construción baixou o paro en marzo, con 34 menos, até 8.725. Por último, 4.184 pertencen á agricultura, baixando en 68 persoas o mes pasado. O único grupo que crece en desemprego é o que non tivo un traballo antes (+96) até chegar a ser 11.583. Desde a CIG, Francisco González Sío, relaciona estes datos co período da Semana Santa e o Camiño de Santiago. “Ten que ver con este modelo baseado na estacionalidade no emprego e na contratación precaria”, denuncia. Este sindicalista, ademais, considera que "coa contratación temporal os traballadores e traballadoras están ao dispor dos incrementos ou baixadas da demanda no sector Servizos, xa de por si precario e estacional”. Isto implica, para a central nacionalista, que as persoas empregadas “ademais de non ter un traballo durante todo o mes tampouco teñen un salario completo, co cal a estacionalidade e, polo tanto, a falta de ingresos aumenta”. Desde a UXT valoran os datos en relación á reforma laboral e consideran que desde a súa aprobación levan “dous anos cumprindo obxectivos”. Con todo, sinalan que “persisten desequilibrios no funcionamento do mercado laboral que é preciso corrixir “como no caso da temporalidade no emprego público” ou na modificación das causas e o custo do despedimento. Radiografía do mercado laboral na Galiza: crece o número de traballadores pobres e 200.000 cobran uns 3.000 euros anuais En relación ás persoas que cotizan no Réxime Especial de Traballadores Autónomos (RETA), o desemprego reduciuse en 1.572 persoas, un descenso do 1,2% en comparación co mes anterior, cun maior emprego na hostalaría (+122).Desde a Asociación de Traballadores Autónomos (ATA), Rafael Granados, explica os datos “positivos” pola "contratación de Semana Santa". A pobreza cada vez máis perto da clase media-baixa galega En opinión da Rede Europea Contra a Pobreza (EAPN nas súas siglas en inglés) a situación económica nos fogares galegos segue a dinámica negativa que tivo nos últimos anos. O seu director na Galiza, Xosé Cuns Traba, indica a Nós Diario que a pobreza chegou “á clase media e media-baixa”. Pon como exemplos aquelas persoas que agora mesmo contan “con salarios que non se poden considerar como de pobreza, como os que se sitúan entre 1.200 e 1.400 euros ao mes, que lles aumenta o perigo de vulnerabilidade”. Explica este panorama socioeconómico polo impacto “da inflación, o impacto do aumento dos custos de enerxía e aqueles vinculábeis coa vivenda fan que a xente dea prioridade a outros gastos”. Esta circunstancia, segundo explica Cuns, posibilita que “se volvemos ter unha crise económica sabemos que afectará a máis capas da sociedade”. Na análise que fai Xosé Cuns dos datos da enquisa conxuntural que publica o IGE entra tamén as medidas que toman as familias en temas tan importantes como a alimentación. “A suba dos prezos dos alimentos que observamos fai que muden os hábitos de consumo”, asegura este activista, “sobre todo a nivel de pobreza, coa compra de produtos de menor calidade, con moita presenza de hidratos de carbono e a preparación a base de fritidos”, engade. Por este motivo, constata que aumentaron na sociedade galega "os problemas de obesidade, polo que tamén está afectando á situación sanitaria do país". Ademais, lembra que, polo mesmo motivo, "hai familias que non poden acceder a mudar de roupa, zapatos ou de mobiliario na súa vivenda".