Preocupación na Mariña: a incerteza sobre Alcoa seguirá até o mes de xaneiro

Tras coñecerse a decisión de Alcoa de aprazar temporalmente a construción do forno de cocción de ánodos na planta de San Cibrao, en Cervo (A Mariña), o Ministerio español de Industria e Turismo convocou esta sexta feira unha reunión coa participación do comité de empresa, da firma e da Xunta da Galiza. O forno de cocción supón o principal investimento da compañía comprometido no acordo co persoal asinado entre as partes o pasado 2021. Un plan de viabilidade que a empresa pediu modificar novamente -xa fora cambiado en 2023- nunha xuntanza previa co comité. A "folla de ruta" de Alcoa San Cibrao fixarase a comezos de xaneiro cunha reunión entre as partes O presidente do comité de empresa, José Antonio Zan (CCOO), sinalou á saída da xuntanza desta sexta feira que "Alcoa segue insistindo en que perdeu 700 millóns de euros e en que o ano que vén serán 200 millóns máis, mais baséase en previsións". "Non compartimos o discurso de Alcoa, xa que as súas perdas dos últimos anos veñen da mala fe que amosou nos xulgados estando en pelexa co persoal, o que a levou a ter que sentar e negociar un plan de viabilidade", criticou Zan. "Sen o forno de cocción non hai acordo de viabilidade, son 109 millóns de euros dos 180 que ten que investir Alcoa", sentenciou ao respecto. "Máis do que xa demos somos incapaces de dar, e exiximos ás Administracións saber como están actualmente as PPA [acordos ou contratos de compravenda de enerxía a longo prazo entre un xerador renovábel e un consumidor], posto que con iso si que se lle pode dicir a Alcoa que se lle está apoiando", dixo. Pola súa parte, Paula Insua e Óscar Lara, representantes da CIG nas reunións, sinalan en declaracións a Nós Diario que "Alcoa insistiu nos seus problemas financeiros para 2024 e en que precisa buscar solucións para poder cumprir o plan de viabilidade renegociado en febreiro deste ano, para o que solicitou novas xuntanzas en xaneiro". "Os Gobernos mostráronse dispostos a colaborar no que poidan, mais dixeron que precisaban coñecer as propostas de Alcoa", explican. Pola súa parte, "o comité non comparte a decisión da empresa de suspender o investimento do forno de cocción de forma indefinida, e exixe o cumprimento do acordo", engade a delegación da CIG. "Ante a proposta actual de Alcoa na que inclúe a planta de alumina na situación de risco, a CIG solicita as mesmas garantías laborais para o persoal da planta de alumina que as asinadas para o persoal de aluminio", conclúen ambos representantes. Diego Ballesteros, portavoz de UXT no comité de empresa, en conversa con este xornal, indica que "segue a incerteza sobre que necesita Alcoa do persoal, que foi o que máis achegou para buscar unha solución ao problema que foi exposto en 2020, e que implicou a parada das cubas". "Recibimos como boas novas o anuncio tanto do Ministerio como da Xunta de que imos traballar todos xuntos nunha mesma dirección para buscar unha solución definitiva e darlle viabilidade e futuro á planta", engade o representante de UXT. "Fixemos moitos esforzos e demostramos lealdade e agora necesítanse concrecións e feitos por parte da empresa. Atopámonos coa fábrica parada e sen data de execución do forno de cocción. Necesitamos que Alcoa dea pasos para demostrar que quere seguir producindo", conclúe. Situación de incerteza A compañía explicou que estima un fluxo negativo de caixa en 2024, nunha conta na que inclúe o investimento comprometido. "Baseándose nas condicións económicas actuais e previsíbeis, é precisa unha solución a longo prazo para afrontar as condicións insostíbeis das operacións en San Cibrao", afirmou. Industria convoca a mesa de seguimento de Alcoa tras o anuncio de suspensión do forno "Os atrasos na enerxía dispoñíbel dos PPA asinados son parte do problema a medio prazo", dixo. "Isto combinado cun prezo do aluminio e da alumina substancialmente máis baixos, creou unha situación moi difícil para Alcoa tanto para 2024 como para os anos seguintes, que debemos considerar de maneira integral", reafirmou. A empresa sinalou que a día de hoxe os PPA poderían cubrir 50% da enerxía necesaria nas plantas. Neste sentido, o Ministerio e a Xunta comprometéronse a ter en xaneiro unha foto definitiva sobre os parques eólicos e as tramitacións administrativas pendentes dos xa aprobados e dos que teñen unha Declaración de Impacto Ambiental positiva. A posición de Alcoa deixa o persoal da empresa na total incerteza, posto que mentres que por unha parte sinala que "está comprometida a cumprir coas obrigas do acordo de viabilidade", afirma ao mesmo tempo que está "buscando solucións potenciais para garantir que as nosas operacións sigan sendo sostíbeis no medio e no longo prazo". O Ministerio ve "positiva" a reunión Rebeca Torró, a secretaria de Estado de Industria, que presidiu a xuntanza desta sexta feira, dixo sobre a reunión que "foi positiva porque nos comprometemos todas as partes a traballar e seguir sumando esforzos polo presente e o futuro de Alcoa". Alcoa traslada ao comité de empresa que quere modificar o plan asinado para 2024 Pola súa parte, a conselleira de Economía, Industria e Innovación, María Jesús Lourenzá, reclamou a Alcoa un calendario de actuacións "claro e con transparencia", á vez que emprazou o Goberno estatal a apoiar a industria electrointensiva.