A partir desta segunda feira abre o prazo para que autónomas, mutualistas, pemes e entidades de economía social poidan optar ás axudas de emprendemento publicadas no Diario Oficial da Galiza (DOG) o pasado 5 de febreiro e dotadas cun orzamento de 6,5 millóns de euros.
Segundo informou a Xunta da Galiza, o obxectivo é “impulsar as iniciativas de empredemento, contribuíndo ao incremento da súa actividade económica e á mellora da súa competitividade”.
Así, poden optar a estas axudas até o 28 de xuño de 2024 as traballadoras autónomas, mutualistas, pequenas e medianas empresas, sociedades, cooperativas e laborais, así como as empresas de inserción e os centros especiais de emprego.
Todos eles teñen que constituírse ou estar dados de alta e iniciar a súa actividade económica desde o 1 de xaneiro de 2022.
As axudas ás que pode acceder van dos 3.000 euros aos 30.900 euros (en función da magnitude do investimento realizado) para dar cobertura, entre outros, a gastos vinculados co proxecto empresarial en materia de equipamento informático, eficiencia enerxética, equipamento e mobiliario, e na reforma das instalacións.