O emprendemento fica na Galiza por debaixo dos niveis previos á crise de 2008

O próximo domingo, como cada 16 de abril, é o Día Mundial das Persoas Emprendedoras. Non obstante, as últimas cifras publicadas polo Instituto Galego de Estatística (IGE) sobre demografía empresarial denotan as dificultades para a a actividade emprendedora na Galiza. Así, de cada 100 empresas que naceron en 2013, tan só continuaban en activo 39,95% en 2021. Os datos non son moito máis positivos eliminando a influencia económica da pandemia, pois antes desa crise, en 2019, tan só permanecían abertas 41,3% das creadas en 2013. A Xunta ve o emprendemento como vía contra a pobreza Ademais, até 23,2% das empresas creadas en 2013 non resistiron o primeiro ano, estando fechadas xa en 2014. A estatística neste sentido empeorou moito nos últimos anos. De cada 100 creadas en 2020, primeiro ano da pandemia, tan só resistiron 50,29% de cara ao ano 2021. No caso da taxa de supervivencia das empresas a catro anos na Galiza, do total de empresas creadas no ano 2017, en 2021 só permanecían 40,38%. Ademais, no ano 2021 a taxa de supervivencia das pequenas e medianas empresas (pemes) creadas en 2017 situouse en 40,37%, mentres que no caso dos traballadores e traballadoras por conta propia a taxa ficou en 30,18%. A taxa de supervivencia empresarial a catro anos tampouco mellora moito ao eliminar o efecto da pandemia da Covid. En 2019, tan só 44,34% dos proxectos iniciados en 2015 continuaba en activo. No caso das pemes a taxa foi de 44,44% e no do persoal por conta propia de 37,64%. Taxa de emprendemento A taxa de actividade emprendedora (TEA) mide a porcentaxe de poboación involucrada en iniciativas emprendedoras de menos de 42 meses de actividade respecto do total da poboación activa. Na Galiza este indicador situouse no ano 2021 en 5,3%, diminuíndo un punto porcentual respecto ao ano anterior, sendo o dato más baixo da serie histórica, con datos desde 2008. A taxa de emprendemento non se recuperou con respecto ás cifras experimentadas no momento do estalido da crise financeira de 2008. Así, a TEA pasou de 8,62% naquel ano a unha taxa de 5,3% en 2021. Eliminando o efecto da pandemia, en 2019 tamén era menor, de 7,2%. Ao respecto, a conselleira de Promoción do Emprego e Igualdade da Galiza, María Jesús Lourenzá, destacou o pasado ano que o impulso emprendedor no país "corresponde coa iniciativa feminina en 60,7% dos casos". Porén, esta taxa é moi semellante á de persoas desempregadas que son mulleres, de 58,3%, denotando que en moitos casos son as persoas en paro as que se ven na obriga de emprender, aínda sen moita esperanza. Máis de tres lexislaturas de derrube da industria A taxa de demografía empresarial mide a relación entre o nacemento e a defunción de empresas nun determinado ano. En 2021, último con datos nesta serie, esta taxa reflexa unha caída de 1,42% das empresas galegas. O aumento de 29% da produción de enerxía agocha a caída do resto da industria galega No caso do sector da industria, a taxa de demografía empresarial experimentou unha caída de 1,15% en 2009. Desde aquel ano, coincidente coa entrada de Alberto Núñez Feixoo e do PP no Goberno da Xunta, o país acumulou 13 anos, até 2021, último con datos, cun saldo negativo na taxa de demografía das empresas do sector da industria. Desta maneira, á espera de coñecer os datos de 2022, durante todos os anos nos que Feixoo estivo ao mando da Xunta da Galiza presentouse un saldo negativo de empresas no sector industrial de forma consecutiva. No último exercicio con datos, o ano 2021, a caída da taxa de demografía empresarial no sector da industria foi de 2,59%. Nese ano, a saldo empresarial tamén foi negativo no sector da construción (-1,61%) e dos servizos (-1,28%), así como para o total das empresas galegas (-1,42%). Desaparición de grandes empresas desde 2018 A operación que levan a cabo algunhas empresas, xeralmente as de maior tamaño, e que consiste en mover todo o seu sistema produtivo a rexións ou Estados que lles permiten producir con menos custos de produción, coñecida como deslocalización, fíxose notar nas estatísticas de demografía empresarial da Galiza durante os últimos anos. A Galiza perde 26 millóns ao mes coa deslocalización de empresas Así, a Galiza acumulou catro anos consecutivos sen datos positivos no censo de grandes empresas, aquelas con máis de 250 persoas traballadoras, entre 2018 e 2021, últimos exercicios con datos. A taxa de demografía de grandes empresas en 2018 resultou nunha caída de 0,93%, dato que empeorou en 2019 (-1,34%), manténdose en negativo en 2020 (-0,86%) e sen cambios no exercicio de 2021 (0%). 13 anos de deserto industrial galego A taxa de demografía empresarial trátase dun índice de importancia para o coñecemento da evolución dos sectores produtivos dun territorio. No caso da industria galega, os datos sinalan unha caída continuada durante os últimos 13 anos, pois este índice, que indica a relación entre o nacemento e a defunción de empresas nun determinado ano, leva sendo negativo de forma continuada para este sector desde 2009, exercicio desde o cal se perden empresas industriais consecutivamente.