Galiza presenta o maior aumento de sinistralidade laboral, tanto en accidentes laborais, con 27% máis no último ano, como in itinere —sinistro que sofre o traballador ao ir ou volver do lugar de traballo—, con 53% máis de taxa interanual. Segundo os últimos datos do informe trimestral sobre absentismo, sinistralidade laboral e enfermidades profesionais realizado polo Adecco Group Institute, no país a incidencia en xornada de traballo é de 256 accidentados por cada 100.000 traballadores.
Esta avultada cifra tradúcese no segundo crecemento máis alto a nivel estatal no último trimestre, e o máis elevado con respecto a 2022, —até 27% máis en ambos os casos— e de 30 in itinere, tamén o aumento máis pronunciado (+55% intertrimestral; +53% interanual). No Estado español a incidencia sitúase en 226 accidentados por cada 100.000 traballadores durante a xornada de traballo (+3% intertrimestral; -4% interanual) e en 35 in itinere (+4% intertrimestral; +4% interanual).
No caso galego, a taxa de absentismo é a sexta máis baixa do Estado (6,5%), tras caer 0,56 puntos porcentuais no último trimestre (+0,1 puntos na comparativa interanual). Un trimestre atrás tiña a sexta maior taxa. En canto ao absentismo por incapacidade temporal, este é dun 5,2%. Diminuíu tres décimas no último trimestre, pero aumentou outras tres con respecto a 2022.
A taxa de absentismo no conxunto estatal para o terceiro trimestre é de 7%. Esta cifra aumentou 0,3 puntos porcentuais en comparanza co segundo trimestre de 2023 e 0,3 puntos porcentuais con respecto ao mesmo período do ano anterior. En canto ao absentismo por incapacidade temporal, o máis importante, a taxa é de 5,5% (+0,3 p.p. intertrimestrais; +0,5 p.p. interanuais).
Absentismo por sectores
Se debullamos a taxa de absentismo galega por sectores vemos que para a Industria é de 7,1% (+0,5 p.p. interanuais, a que máis crece no país), manténdose como o sector coa taxa máis alta. Nos Servizos o índice de absentismo galego queda en 6,6% (+0,2 p.p.), sendo Galiza a quinta menor do conxunto autonómico neste caso. E na Construción a súa marca fica en 5,2% (+0,3 p.p. interanuais).
No resto de territorios, Euskadi conta de novo coa taxa de absentismo máis alta do Estado, de 9,7% (-0,1 p.p. interanuais), e tras ela sitúanse Nafarroa (-0,2 p.p.) e Catalunya (+0,7 p.p. interanuais), ambas as dúas con 7,9%. E as menores taxas de absentismo están en Balears, con 4,3% (+0,4 p.p. interanuais) e Castela-A Mancha, con 5,9% (-0,4 p.p. interanuais).
