Os sindicatos UXT e CCOO rexeitaron continuar as negociacións coa aerolínea Iberia e retomaron a convocatoria de folga para os traballadores do handling —transporte de equipaxes— durante o Nadal, esta vez para os días 5, 6, 7 e 8 de xaneiro, en plenas festas de Reis e da 'operación retorno' das vacacións de Nadal. Segundo un comunicado emitido por Iberia, tras unha primeira reunión celebrada co Ministerio de Transportes, os sindicatos rexeitaron continuar coas conversas para atopar unha vía alternativa ao autohandling.
A compañía asegura que fixo unha oferta "ambiciosa" que serviría para "reforzar aínda máis os dereitos dos traballadores", garantindo o V Convenio do sector "para sempre". A oferta realizada por Iberia garantiría, segundo a aerolínea, todos os postos de traballo por subrogación, polo que non habería "nin destrución de emprego nin eliminación directa de postos de traballo".
Aliás, garante tamén o salario calculado en base aos últimos doce meses, a mesma xornada anual e días de vacacións que o último ano, a antigüidade do traballador, o mesmo tipo de contrato e grupo laboral, a revisión salarial estabelecida en convenio, así como os dereitos adquiridos sobre o uso dos billetes de avión e os plans de pensións.
Creación dun modelo híbrido
Durante o encontro a compañía puxo sobre a mesa a creación dun modelo híbrido participado por unha empresa do Grupo IAG, explorando a posibilidade de que este vehículo fose 100% deste grupo nos aeroportos onde "tivese sentido", que realizaría o handling para todas as aerolíneas de IAG nos oito aeroportos nos que a compañía perdeu a licenza tras o concurso de servizos de terra de Aena e que preservaría a posición competitiva do negocio. Con todo, esta proposta foi rexeitada polos sindicatos.
Iberia asegura que tras a convocatoria de folga confirmada hoxe, "as propostas realizadas pola compañía quedan automaticamente retiradas". Por tanto, a única solución contemplada é a subrogación ás empresas adxudicatarias do concurso de Aena. Iberia asegura que facilitará ese proceso de subrogación e velará porque se respecten "todas as garantías establecidas legalmente".
No comunicado feito público tras coñecer a convocatoria de folga por parte dos sindicatos, Iberia reitera o seu chamamento á desconvocatoria da folga e pide aos sindicatos que "volvan á senda da responsabilidade". A compañía asegura que non vai realizar o autohandling debido ao "importante impacto" que suporía nas súas contas e, especialmente, pola notábel perda de competitividade en favor das liñas aéreas que atenderían as compañías adxudicatarias do concurso de Aena.
"O autohandling nos oito aeroportos asestaría un golpe definitivo ao futuro do negocio do servizo de terra", aseguran desde a aerolínea. "Unha folga en plena festas de Reis só causará enormes prexuízos, especialmente, a miles de viaxeiros que elixen esas datas para gozar coas súas familias", asegura a aerolínea, que advirte de que convocar unha folga nestas datas do Nadal afectaría máis de 90 compañías aéreas.
Os sindicatos ven un exercicio de "trilerismo"
Esta mesma semana UXT e CCOO decidiran pospor a convocatoria de folga tras o ofrecemento do Goberno estatal para mediar no conflito. Así, esta cuarta feira ambos os sindicatos mantiveron unha serie de conversas co Ministerio para buscar unha solución. Segundo detallaron os sindicatos, no marco das negociacións a compañía aérea propuxo a creación dunha empresa liderada por unha adxudicataria gañadora dos concursos, cunha participación maioritaria a 80%, xunto a unha empresa minoritaria que pertencese a IAG, que sería Yellow Handling.
Os sindicatos consideraron que esta "invención" era "ilegal" por non cumprir co real decreto correspondente. Na súa opinión, isto suporía unha segregación do negocio e, á súa vez, o incumprimento dos acordos asinados nos últimos convenios. Aseguran tamén que durante a reunión desa semana na sede de Iberia a compañía realizou un exercicio de "trilerismo e prestidigitación". Segundo explicaron a Europa Press fontes da negociación, o Ministerio de Transportes expuxo alternativas sobre as que estabelecer novos leitos de negociación e tratar de alcanzar un acordo para os traballadores dos aeroportos afectados pola perda das licenzas de handling.
Durante as conversacións debateuse a posibilidade dunha empresa participada a 100% por Iberia que xestionase o autohandling e a pesar de avanzar nese deseño, "non se acabou de concretar nada". Os sindicatos reafírmanse en que Iberia debe de facerse cargo da asistencia das compañías do Grupo IAG "en propio".
Desde os sindicatos reclámase á compañía que garanta un plan de viabilidade para o negocio do handling, unha solución para os oito aeroportos afectados, e que no caso de existir excedentes de persoal que supoña un sobrecusto á nova operación, que realice un "acordo expreso de desvinculación pactado" (ERE). Os sindicatos aseguran que a actitude "oportunista" da dirección da empresa non lles deixa outro camiño que convocar mobilizacións do 5 ao 8 de xaneiro reiterando que "a irresponsabilidade é unha vez máis da compañía".
