O Tribunal Supremo (TS) desestimou o recurso de casación no que a Asociación Plataforma Vítimas do Alvia 04155 pedía que se cesase os integrantes da actual Comisión de Investigación de Accidentes Ferroviarios, á que achacaba non ser independente, para que -unha vez renovada- realizase unha nova investigación do accidente ocorrido na curva de Angrois.
A Sala do contencioso-administrativo na súa sentenza estabelece que a regulación actual da citada Comisión de Investigación pola Lei do Sector Ferroviario (Lei 38/2015) garante a súa independencia funcional e que é conforme co dereito da Unión Europea sobre a materia, a Directiva 2016/798.
Apunta que a súa dependencia do Ministerio de Transportes é tan só a efectos de organización administrativa, como sucede cos demais organismos reguladores respecto aos Ministerios correspondentes, e non obsta á súa plena independencia funcional no exercicio das súas funcións de investigación, sen que poida recibir instrucións de ningún órgano da Administración.
"Expertos na materia"
Engade que o nomeamento dos seus membros, “expertos na materia”, por parte do ministro de Transportes está sometido a control parlamentario.
O tribunal conclúe por iso que é conforme a dereito a sentenza impugnada do Tribunal Superior de Xustiza de Madrid, que resolvera que corresponde á Comisión de Investigación de Accidentes Ferroviarios, coa súa actual configuración, examinar e ditar sentenza sobre a solicitude da asociación recorrente de que se proceda a unha nova investigación do referido accidente.
O tribunal sinala así mesmo que a función da citada comisión é exclusivamente a investigación técnica sobre as causas e circunstancias dos accidentes, así como formular propostas de mellora en caso necesario, pero en ningún caso a depuración de responsabilidades, o que corresponde á xurisdición penal.
