Máis unha cuarta feira e con ela, o semanario en papel Sermos Galiza, que xa se pode adquirir na loxa, sae do prelo. A partir da quinta feira estará dispoñíbel nos quiosques e puntos de venda habituais o número 365, cuxo protagonista é a mudanza climática. A isto dedicamos o Tema de Primeira, en que ecoloxistas analizan a estratexia da xunta a respeito do clima.
En opinión, recollemos as voces de María Pilar García Negro e de Xavier Queipo, alén do cadriño de Nacho Hortas. Ademais, Xoán Costa publica unha semana máis unha nova entrega de A ollo nu.
Sociedade abrímola cunha reportaxe que evidencia as loitas de poder e de intereses económicos que se agochan tras a primeira universidade privada da Galiza. Tamén informamos do estado en que se atopan as distintas variedades de cabaliños do demo na nación.
En Economía entrevistamos Xosé Paleo, presidente do Comité de Empresa de Alcoa San Cibrao e en Política poñemos o ollo nas eleccións estatais e en como as afrontan as forzas políticas galegas. Unha crónica do debate sobre o estado da nación completa a sección.
Internacional dedicámolo a analizar Portugal nas semanas previas ás eleccións.
En Fóra de Serie comezamos coñecendo o exilio galego do século XV nunha nova entrega de A Galiza ignorada. Continuamos volvendo a vista atrás aos primeiros filmes en galego. Ademais, publicamos novas críticas de cinema e de literatura, coñecemos a última obra de Adolfo Caamaño e visitamos o litoral de Cedeira. Para repoñer forzas logo da andaina, propoñemos vasiños de chocolate, queixo e galletas.
Esta semana escriben no Fóra de Serie Carme Adán e Míriam Ferradáns. Féchao Montse Fajardo cun perfil sobre Manuel Coto na sección De memoria.
O número 365 de Sermos Galiza xa está dispoñíbel na loxa e nos quiosques.
![Zona queimada por un incendio en Crecente (A Paradanta). [Imaxe: Adrián Irago / Europa Press]](/asset/zoomcrop,480,270,center,center/media/nosdiario/images/2024/05/01/2024050121174923623.jpg)
