Un guindastre retirou no mediodía desta cuarta feira un coche do fondo da auga no porto de Tragove, en Cambados (O Salnés). No seu interior había un cadáver, polo que agora a Garda Civil traballa para identificalo e esclarecer as causas do falecemento.
Segundo fontes do Instituto Armado citadas pola axencia Europa Press, "todo apunta" a que se trataría dun veciño do municipio de 65 anos de idade que leva desaparecido desde o 30 de abril de 2022, cando saíu da súa casa co seu vehículo.
Na mañá desta cuarta feira, a Garda Civil recibiu un aviso dun coche que se atopaba na auga e, posteriormente, deuse a alerta ao Grupo Especial de Actividades Subacuáticas (GEAS), que acudiu ao lugar.
A Garda Civil foi capaz de retirar do mar o coche contra as 13 horas e unha primeira inspección ao vehículo desvelou que no seu interior había restos humanos que serán analizados para a súa identificación.
Desta forma, serán os cotexos de ADN os que determinarán de forma oficial se se trata ou non do sexaxenario cambadés que leva case medio ano desaparecido.
