Retencións na entrada e saída de Vigo por un accidente múltiple

Catro persoas resultaron feridas leves na mañá desta segunda feira despois de producirse un accidente múltiple na autoestrada AP-9 ao seu paso por Vigo, con varios vehículos afectados e importantes retencións no tráfico.

Segundo trasladaron desde o 112-Galiza, os feitos producíronse pouco despois das 7.40 horas e foi un particular o que alertou dunha colisión por alcance no punto quilométrico 152 da AP-9, en dirección Tui (Baixo Miño) á altura do barrio vigués de Teis.

Como resultado deste sinistro, catro coches víronse implicados e as persoas feridas saíron sen complicacións dos vehículos, se ben si se solicitou a intervención dos servizos sanitarios de urxencias, da Garda Civil de Tráfico, da Policía Local de Redondela e de Vigo, dos servizos de mantemento da estrada e dos bombeiros e Protección Civil de Vigo, que non se chegaron a desprazar ao momento.

Finalmente, catro persoas foron evacuadas en ambulancia a un centro hospitalario tras presentar lesións leves. O incidente provocou longas retencións na zona, de máis de media hora, que chegaron até a ponte de Rande.