Rescatados seis cachorros que foran arroxados a un colector en Moraña

O Centro de Acollida e Protección de Animais (CAAN) da Deputación de Pontevedra vén de rescatar seis cachorros que foran arroxados a un colector no municipio de Moraña (comarca de Caldas) e que se calcula que teñen arredor de tres semanas de idade. Os animais, tres femias e tres machos, segundo apuntou o ente provincial, "atópanse en bo estado de saúde a pesar das circunstancias" e seguen a recuperarse nas instalacións da área de maternidade do centro na Armenteira, en Meis.

Foi o persoal de Protección Civil de Moraña o que alertou do achado dos cachorros, tres femias bautizadas como Sary, Maguy e Tula e tres machos, Tulo, Golfo e Tuco. "No CAAN están a recibir os coidados necesarios até completar o proceso para saír en adopción, que se prevé nun par de meses en canto conten coa pauta de vacinación completa. Amais, os animais sairán desparasitados interna e externamente e con chip", salientan.

Na actualidade, hai 52 concellos da provincia de menos de 50.000 habitantes adheridos ao CAAN, coa premisa de "fomentar o dereito á vida dos animais, erradicar o abandono e promover as adopcións". O centro traballa 24 horas ao día os 365 días do ano, con servizos de recollida e veterinario de urxencia, e as adopcións son gratuítas.

Sancións na nova lei

A recentemente aprobada Lei de benestar animal prevé para os casos de abandono nos que "poida perigar a vida ou integridade" do animal, como este caso de Moraña, unha pena de multa de un a seis meses ou de traballos en beneficio da comunidade de 31 a 90 días, así como a inhabilitación para o exercicio da "profesión, oficio ou comercio" relacionada cos animais, e para a propia tenza, de un a tres anos.

O abandono dun ou máis animais, aliás, está considerado como unha infracción grave, polo que a sanción económica oscila entre os 10.001 e os 50.000 euros. "Non se considerará como falta grave, senón como leve, a falta de comunicación da perda ou subtracción dun animal; por contra, considerarase como infracción grave o non recoller o animal das residencias ou outros estabelecementos similares nos que fose recolleito, e o abandono do animal en condicións de risco", dispón a lei.