Medran as protestas: pacientes e persoal sanitario saen á rúa acusando a Xunta de levar ao colapso a sanidade

Santiago de Compostela, A Coruña, Burela (A Mariña), Ferrol, Lugo, Monforte de Lemos, Pontevedra e Vigo acolleron na mañá desta quinta feira mobilizacións convocadas polo colectivo de enfermeiras A Por Todas. As protestas, que contaron cunha nutrida participación, convocáronse para denunciar “o uso abusivo de contratos precarios, de días, ou no mellor dos casos, de meses, nos cales, en moitas ocasións, o horario laboral é comunicado ao traballador con un só día de antelación, tendo que exercer o seu traballo nunha unidade diferente cada día ou incluso dentro da mesma xornada”. O colectivo alertou de que “cada vez faise máis evidente a falta de enfermeiras dispoñíbeis para cubrir as ausencias do persoal estábel” e criticou que “a xestión do Sergas céntrase na improvisación continua afectando a calidade dos coidados que ofrecemos”. Neste sentido, advertiu de que “a mala xestión da administración e a falta de previsión das crecentes necesidades dunha poboación cada vez máis lonxeva favorecen o deterioro da sanidade pública, o incremento desorbitado da actividade privada e a migración de compañeiras fóra da Galiza”. Enfermeiras As mobilizacións do colectivo A Por Todas contaron co apoio da Confederación Intersindical Galega (CIG). O sindicato sinalou que “as reclamacións formuladas coinciden coas que vén reivindicando a central sindical para o conxunto do persoal da sanidade pública galega” e defendeu “unha dotación de persoal adecuada ás necesidades tanto no ámbito de Atención Primaria como en hospital”. Pacientes do CHUS querélanse contra Sanidade pola opacidade nas listas de espera O Colexio de Enfermaría da Coruña manifestouse nunha dirección semellante. A este respecto, esixiu a “mellora das ratios enfermeira-doente”, a “mellora da contratación, a estabilidade da mesma e transparencia”, a “recuperación de 100% da paga extra, o recoñecemento do solape de xornada” e “a retribución do plus de festivo os sábados”. Precisamente, a Galiza, rexistra das peores ratios do Estado en dotacións de enfermaría, con tan só 517 profesionais por cada 100.000 habitantes. As ratios de persoal de enfermaría están moi por baixo da media comunitaria e das recomendacións da Organización Mundial da Saúde (OMS). A Galiza precisaría de 8.351 enfermeiras máis para situarse na media dos Estados da Unión Europea (UE), de 10.614 enfermeiras máis para cumprir coas cifras esixidas pola OMS e de 7.678 enfermeiras máis para colocarse nos niveis dos países da Organización para a Cooperación e Desenvolvemento Económico (OCDE). Persoal de enfermaría O cadro de persoal de enfermaría do Servizo Galego de Saúde está ademais moi envellecido. A este respecto, a idade media do colectivo é moi elevada o que avanza a xubilación dunha parte importante do mesmo nos próximos anos. Os datos procedentes do Servizo Galego de Saúde apuntan que 9,8% das profesionais da enfermaría superan 64 anos de idade, con tres en 70 anos, 65 na faixa de 69 a 66 anos e 160 en 65 anos. Asemade, 15,3% atópase no grupo de idade de entre 63 e 64 anos, con 162 profesionais en 64 e 193 en 63 anos. A veciñanza de Moaña non renuncia ás Urxencias e rodea o centro de saúde no centésimo domingo consecutivo de protestas Profesionais do distrito sanitario da Mariña concentráronse esta quinta feira en Burela para reclamar melloras na calidade asistencial. Neste sentido, reivindicaron a “mellora na dotación de material de traballo nas plantas de hospitalización”, a mellora do cociente persoal-doente, melloras na contratación temporal mediante “transparencia nos chamamentos" e “contratos con carteleira para favorecer a conciliación”. Rexeitaron ademais o feche de camas no hospital da Mariña na tempada de verán. Ribeira Ribeira, na comarca do Barbanza, tomou o relevo de Burela. Neste caso, a veciñanza mobilizouse para celebrar a recuperación dos servizos médicos na parroquia de Corrubedo tras 12 meses de loita. A este respecto, o rexedor da localidade, o nacionalista Luís Pérez Barral, indicou que desde o Concello estarán “vixiantes para que desde o Sergas non se volva dar un paso atrás no servizo sanitario” e solicitou que a Consellaría de Sanidade “atenda ss reivindicacións de máis profesionais médicos”. Moaña e Viveiro As mobilizacións en defensa da sanidade pública terán continuidade o domingo en Moaña (O Morrazo) e Viveiro (A Mariña). A vila moañesa está convocada a saír á rúa unha semana máis para reclamar a recuperación do servizo do Punto de Atención Continuada (PAC), mentres a localidade da Mariña está convocada pola Plataforma en Defensa da Sanidade Pública e polo Concello de Viveiro a unha mobilización diante do centro de saúde, para reclamar a cobertura das baixas do persoal facultativo e a restitución do servizo de Pediatría. Sanidade aumenta o gasto en capeláns para os hospitais públicos: serán 770.000 euros en 2024 A tenente de alcalde da localidade mariñá, a nacionalista, Miriam Bermúdez, sinalou que “a falta de facultativos estes días é substituída parcialmente durante un máximo de catro horas cada día, agravando aínda máis a situación e pondo en risco a saúde das veciñas e veciños. Máis non imos tolerar que se xogue coa saúde das persoas, por iso é primordial a mobilización social”. Na mesma dirección, apuntou que “no centro de saúde de Ourol, durante as ausencias do titular, non hai ninguén suplíndoo, co cal máis dun milleiro de persoas queda sen asistencia médica, o que obriga a desprazarse até o concello de Viveiro, colapsando o PAC e mesmo as urxencias hospitalarias”. Máis de 68% dos concellos da Galiza carecen de servizo de Pediatría Os recortes nos servizos de Pediatría son unhas das cuestións que máis malestar están a xerar entre a poboación de Viveiro. Neste sentido, a alcaldesa da localidade, a socialista María Loureiro, explica que “están a substituír os pediatras que faltan con dúas profesionais que se desprazan desde Lugo, máis só veñen cinco ou seis días ao mes, o que case é o mesmo que dicir que deixaron as poboacións de Viveiro, O Vicedo e Ourol sen pediatras”. Nesta dirección, apunta a que “non podemos consentir este ataque á sanidade pública e á atención das nosas crianzas e por iso imos concentrarnos de novo, como hai un ano e a mobilización será igual de multitudinaria”. A falta de persoal de Pediatría é unha constante en toda Galiza. Segundo os datos achegados polo Instituto Galego de Estatística (IGE) para 2022, 64,2% dos municipios da Galiza non contan con pediatras, prestando a atención en 13,1% destes persoal médico sen titulación e formación axeitada. Asemade, unha porcentaxe significativa das prazas dotadas polo Goberno galego permanecen vacantes durante unha parte do ano, sendo esta situación permanente en 4,6% dos concellos. Ao tempo, a Asociación Española de Pediatría de Atención Primaria sinalou en 2020 que perto de 85% dos pediatras galegos en activo tiñan máis de 50 anos, 40% deles máis de 55 anos e 33% superaban os 60 anos, o que avanza unha forte redución de profesionais nos próximos anos como consecuencia do envellecemento dos cadros de persoal. Só nos orzamentos da Xunta da Galiza de 2023 amortizáronse sete prazas.