Ao tempo que se suceden as queixas de moitas persoas usuarias e colectivos en xeral pola falta de conectividade desde algúns puntos ou a horas determinadas, anúnciase que Ourense contará cun novo tren Alvia para conectar a cidade con Madrid cando se estree o tramo da liña de alta velocidade entre as localidades de Zamora e Pedralba.
O presidente de Renfe, Isaías Táboas, explicou a unha delegación de cargos do PSOE que esa conexión será a primeira hora da mañá. Para poñela en marcha só é necesario que entre en servizo o tramo intermedio.
Concretamente, debatendo o asunto con Táboas estiveron Uxía Tizón e Adolfo Pérez Abellas, deputados; o senador Miguel Bautista e o secretario provincial do PSOE, Rafael Villarino.
Foron os socialistas os que quixeron informar desta nova conexión após que estes últimos días xurdiran queixas contra Renfe por aproveitar a situación epidemiolóxica de Ourense para recortar aínda máis a mobilidade de moitas veciñas e veciños.
Desde o PSOE amosan a súa satisfacción coa "melloría da conexión".
Ademais, avanzaron que "temporalmente" haberá asistencia persoal nas estacións de ferrocarril das vilas de Ribadavia, O Barco de Valdeorras, A Rúa e O Carballiño. A idea é axudar a que as e os viaxeiros se familiaricen "coa compra nas máquinas de autovenda".
"Renfe informou de que o servizo Avant entre Ourense, Santiago e A Coruña conta, na actualidade, cunha das maiores taxas de reposición de servizos do Estado, alcanzando un 86% da oferta que existía con anterioridade ao estado de alarma", destacaron desde o partido.