Choivas e ventos costeiros marcarán climatoloxicamente a xornada desta segunda feira, día 13, na Galiza. A entrada dunha nova fronte intensificará o vento do suroeste e traerá chuvias persistentes sobre todo na metade oeste. Ademais, e segundo Meteogalicia e Axencia Estatal de Meteoroloxía advirte de alerta amarela en toda a costa da Galiza agás A Mariña, así como en comarcas do interior como Barbanza, Muros-Noia, Fisterra ou A Mariña, entre outras.
O fenómeno meteorolóxico adverso comezará este mediodía e agárdase unha precipitación acumulada en 12 horas de 80 mm na Coruña, que pode chegar puntualmente aos 120 mm. A Xunta activa a alerta laranxa por choiva no oeste da Coruña. O resto da provincia, as Rías Baixas e o interior de Pontevedra quedan en alerta amarela, con precipitacións acumuladas de 60 mm. en 12 horas na área coruñesa, que poden chegar a 100 mm., e de 40 mm. na pontevedresa. Tamén está activada a alerta amarela por temporal costeiro en todo o litoral galego.
Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro Integrado de Atención ás Emerxencias 112 Galicia, informou da situación aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
A semana principia, pois, na mesma dinámica que no último mes, marcado polas chuvias e ventos fortes na costa. As temperaturas quedarán sen cambios significativos, quedando unha xornada de moi pouca oscilación térmica. Os ventos soprarán moderados do suroeste, con refachos fortes na Mariña e fortes no litoral.
A costa do municipio de Viveiro, na Mariña, rexistrou refachos de vento de case 120 quilómetros por hora esta fin de semana, na que a Galiza estivo en aviso amarelo o sábado por precipitacións.
Segundo os medidores de Meteogalicia, o interior da provincia de Pontevedra é a zona onde máis auga caeu esta fin de semana cos 56,3 litros por metro cadrado de Cuntis (comarca de Caldas de Reis) ou 44,3 l/m2 en Poio, comarca de Pontevedra.
En canto aos ventos, que manteñen en aviso amarelo a costa norte galega, a estación situada no alto viveirense de Penedo do Galo captou un refacho máximo de 118 km/2.
Na Pontenova (A Mariña), Cervantes (Ancares), Baleira (comarca da Fonsagrada), Vimianzo (Terra de Soneira) ou Cuntis tamén soprou con intensidade o vento, con refachos que roldaron o 90 km/h.
