Un axente da Policía Nacional de 46 anos natural da Galiza morreu na madrugada desta cuarta feira nun tiroteo coas forzas da orde nunha gasolineira de Villagonzado-Pedernales, en Burgos. Trátase dun axente destinado nunha comisaría da Coruña, onde a pasada terza feira roubou unha arma.
O falecido atopábase inmerso nunha investigación de asuntos internos pola que se lle retirou a arma. E segundo informa a Delegación do Goberno español na Galiza, o finado estaba de baixa psicolóxica e desde esta terza feira, 18 de abril, pasara a segunda actividade "por insuficiencia de aptitudes psicofísicas", unha situación, con todo, que estaba pendente de notificar.
O falecido acudiu á comisaría na cal estaba destinado para realizar un trámite administrativo en relación coa súa situación laboral. Posteriormente, dirixiuse aos vestiarios do persoal, "momento que aproveitou para subtraer a arma doutro policía forzando o armario onde estaba gardada".
Ao decatarse este axente da subtracción da súa pistola púxose en marcha un "amplo dispositivo" para a súa localización, "xa que se tiña a certeza de que o agora falecido era o responsábel do roubo e que fuxira por estrada nun vehículo", aseguran as mesmas fontes.
O Centro Operativo de Servizos (COS) da Garda Civil de Burgos recibira un aviso procedente da Policía Nacional no cal se comunicaba que unha persoa armada se dirixía a Burgos pola estrada A-231 e cando se puido determinar a súa posición, perto da capital burgalesa, por parte da Garda Civil e da Policía Nacional desta provincia estabeleceuse un dispositivo operativo para interceptalo antes da súa chegada á cidade. Os axentes déronlle o alto, pero fixo caso omiso e disparou sobre eles.
Segundo relatan as mesmas fontes, este home, de 46 anos, continuou a súa fuxida até unha estación de servizo próxima, na localidade de Villagonzalo Pedernales, onde, tras disparar por segunda vez sobre os axentes da Policía Nacional e da Garda Civil, resultou falecido ao ser alcanzado polas balas ao redor das 4 horas.
A Delegación do Goberno precisou que aínda que se produciron varios impactos de bala nos vehículos oficiais, "ningún dos axentes das forzas e corpos de seguridade do Estado de servizo [que estaban perseguindo o galego] resultou ferido".
As dilixencias que instrúe a Garda Civil foron declaradas secretas pola autoridade xudicial.