Nas últimas 24 horas detectáronse 301 casos activos de coronavirus, 23 menos que na xornada anterior, co que a variación de positivos diagnosticados por PCR mantén a súa tendencia da última semana de moverse entre os 250 e os 350 positivos diarios.
Ademais, continúa este sábado a tendencia á baixa na presión hospitalaria cun novo descenso no número total de hospitalizados con covid-19, que se sitúa en 352, oito menos que 24 horas antes. Con todo, prodúcese un repunte nas persoas en UCI ao elevarse en tres ata as 54.
Segundo os últimos datos facilitados na web da Consellaría de Sandiade con datos solicitados até as 18 horas desta sexta feira, momento no que baixaban de novo os casos activos, aínda que con subas en áreas como a de Compostela, que supera xa a Pontevedra como a terceira con máis positivos tras Vigo e A Coruña.
Situación hospitalaria
En relación á situación nos hospitais, os da área sanitaria da Coruña-Cee mantéñense co maior número de ingresos con coronavirus. Son agora 87, catro menos que 24 horas atrás, con 13 deles en UCI.
En Vigo baixan este sábado en 10 as hospitalizacións con Covid-19 até situarse en 62, aínda que a caída nótase menos en UCI, onde permanecen once persoas, unha menos que hai un día, con 11 deles en críticos.
Pola contra, aumentan os ingresados na área de Santiago-Barbanza, que presenta agora cifras similares ao distrito vigués. E é que son nestes momentos 61 as persoas hospitalizadas, once máis que na xornada anterior, e con once deles en críticos.
Na área de Pontevedra-O Salnés baixan en tres os ingresos até os 48, dos cales, nove atópanse na UCI. No resto de distritos soben os hospitalizados: en tres no Ourense-Verín-O Barco e son 32, dous en UCI (sen cambios), en dous en Ferrol (33, catro en críticos) e tamén en dous en Lugo-A Mariña-Monforte (29, catro en UCI).
Baixan os positivos
En canto á detección de casos, Galiza diagnosticou de Covid-19 nas últimas 24 horas a 301 persoas -23 menos que un día atrás- nunha xornada na que se realizaron 7.614 probas PCR, tan só 182 máis que o día previo.
Compostela foi a área sanitaria na que maior número de casos positivos foron descubertos con 72, 35 máis que na xornada anterior. A variación negativa nos positivos é mási importante en Vigo, onde se diagnosticou covid a máis da metade de persoas que 24 horas antes: 62 por 126.
Na Coruña deron positivo 43 persoas (9 menos), en Pontevedra 58 (19 máis), Lugo 18 (7 máis), Ferrol 28 (7 máis) e Ourense 30 (dúas menos).
Taxa de positividade
A taxa de positividade das probas sitúase en 3,4%, dous puntos por baixo da alcanzada na xornada anterior, co que Galiza volve situarse por baixo do limiar do 5% que marca a Organización Mundial da Saúde para dar por controlada a pandemia.
Por áreas sanitarias, só Compostela pasou ese limiar ao alcanzar unha porcentaxe de positivos por PCR do 6,4%. O resto mantivéronse por baixo desa cifra: A Coruña (2,5%), Ferrol (2,5%), Lugo (1,9%), Ourense (4,7%), Vigo (1,3%) e Pontevedra (4,7%).
Baixan os casos activos
No que respecta a os casos activos en toda Galiza --é dicir, a cifra total de persoas diagnosticadas da enfermidade--, o país continúa a súa tendencia á baixa e este sábado chega a 5.530, 154 menos que o venres.
Das sete áreas sanitarias, hai tres nas que soben os casos activos. En concreto, son Santiago-Barbanza, con 852 (28 máis); Pontevedra-Salnés, con 851 (12 máis); e Ourense, con 402 (20 máis).
En canto ao resto, a área de Vigo é a que continúa acumulando máis casos activos, aínda que baixan a 1.315, 86 menos que o día anterior. Tamén descenderon na Coruña, ata os 1.017 -76 menos-. Pola súa banda, en Ferrol hai 547 (-24); e en Lugo-A Mariña-Monforte, 545 (-26).
Persoas curadas e falecidas
Sanidade tamén recolle na web de datos que desde o principio da pandemia diagnosticouse de covid-19 en Galicia a un total de 56.061 persoas, das que 49.232 curáronse, 484 nas últimas 24 horas.
Con todo, as vítimas mortais da pandemia na Galiza segue en aumento e son xa 1.303 tras a confirmación de dez novos falecidos con Covid-19 por parte das autoridades sanitarias nas últimas horas. Entre os últimos decesos comunicados había cinco relacionados con residencias de maiores.
