Galiza Nova, organización xuvenil do BNG, realizou esta quinta feira unha acción simbólica nun supermercado da cadea Mercadona para reivindicar a "estafa" que, segundo a organización, supón a actual crise de prezos.
A acción consistiu na pegada de cartaces en diferentes partes do supermercando en que se podían ler mesanxes como "isto é un roubo" ou "esta crise é unha estafa".
Marta Gómez, Secretaria Xeral da organización xuvenil, indicou que "a suba desenfreada dos prezos, concretamente na cesta da compra, repercute directamente nos nosos petos".
![Un dos cartaces pendurados por Galiza Nova (Foto: Nós Diario).](/media/nosdiario/images/2022/12/02/2022120218294798290.jpg)
"O litro de aceite subiu 28%, o litro de leite 25%. A mocidade galega vemos como cada semana que vimos ao supermercado a compra é cada vez máis cara e ás veces non nos podemos permitirnos comer todo o mes" acrecentou Gómez.
"Dar unha resposta"
Esta acción, enmarcada dentro da campaña 'Actuar agora para defender a vida' que está levando a cabo Galiza Nova, pretende, segundo salientan, "dar unha resposta visual e facer ver o descontento da sociedade galega neste contexto de crise económica e social no cal a mocidade é un dos sectores máis afectados".
"Isto é un roubo e contra el debemos mobilizarnos” sinalou Gómez. "Para que se deixe de especular cos bens de primeira necesidade e para que se deixe de facer negocio cos nosos dereitos é necesario dar unha resposta social e contundente nas rúas" engadiu.
Galiza Nova pretende con esta campaña chamar toda a mocidade galega a mobilizarse o vindeiro 18 de decembro en Santiago de Compostela, na manifestación convocada polo BNG contra a crise dos prezos. “Queremos animar a toda a mocidade a actuar agora, porque ese é o modo de defender as nosas vidas” sentenciou Gómez.