Entre berros de "viva o rei" e "ladrón", Juan Carlos I volveu subir esta quinta feira a bordo do Bribón en Sanxenxo, onde ten previsto participar das regatas desta fin de semana, no marco do XXIV Trofeo Hotel Carlos I Silgar para embarcacións de clase 6m, puntuábel para o V Circuíto Liga Española deste tipo de buques.
E igual que en anteriores ocasións, Galiza Nova volverá protestar este sábado contra a presenza do rei emérito na Galiza na que é a súa terceira visita desde que marchou a Emiratos Árabes Unidos en 2020, marcado por numerosos escándalos e polémicas que levaron a propia Casa Real a pedirlle que se afastase do foco mediático.
Baixo o lema 'Galiza non ten rei', a organización xuvenil do BNG chama a participar da concentración convocada o sábado, día 29, ás 12 horas na praza de Portugal —onda a escultura do Aviador Piñeiro— do municipio do Salnés.
"De novo temos que ver como o rei emérito español visita o noso país con impunidade absoluta", censuran desde Galiza Nova, ao tempo que chaman a proclamar este sábado "que Galiza non ten rei, e menos un corrupto".
🚫 De novo temos que ver como o rei emérito español visita o noso país con impunidade absoluta.
📢 Este sábado 29 convocamos unha concentración na Praza de Portugal de Sanxenxo ás 12.00h para gritar que Galiza non ten rei, e menos un corrupto!
Avante coa #RepúblicaGalega ✊ pic.twitter.com/bJZM8C2lWU— Galiza Nova (@galizanova) July 27, 2023![Publicidade 195255]()
Malia que non hai impedimentos legais para a súa volta ao Estado español, distintas enquisas en 2022 cifraron en dous terzos da poboación estatal o rexeitamento ao seu comportamento e ao feche das pescudas contra el.
Neste contexto, na súa primeira viaxe ao territorio estatal tras a súa fuxida, en maio de 2022 e perante unha importante exposición pública, o rei Felipe VI trasladou ao pai que futuras visitas terían que decorrer coa “maior privacidade posíbel”, remarcando que a súa residencia permanente sería Abu Dabi.
