A sentenza do Tribunal Supremo sobre o parque eólico de Corme "non fará decaer a loita xudicial contra o espolio eólico que desafortunadamente está a ter lugar na Galiza e que pon en grave risco o desenvolvemento rural e sostible da nosa terra".
Máis de medio centro de colectivos en defensa do territorio, plataformas veciñais, grupos ecoloxistas e sindicatos, entre outros, asinan un comunicado conxunto no que avogan por continuar co "litixio xudicial fronte ao desenvolvemento eólico e inadecuado" que afecta a numerosas comarcas da Galiza.
O Supremo desdí o TSXG
En resposta á resolución da Sección Quinta da Sala III do Tribunal Supremo, que vén de revogar unha sentenza do Tribunal Superior de Xustiza da Galiza (TSXG) que anulaba a autorización administrativa para proceder a repotenciación do parque eólico Corme G-3, no concello de Ponteceso, o movemento veciñal, social e ecoloxista considera que son numerosas as causas de incumprimento e continuarán "preiteando contra as eólicas".
O auto do Supremo estima o recurso presentado pola Xunta da Galiza máis EDP Renovábeis e considera que a licenza outorgada o 16 de setembro de 2019 pola Consellaría de Economía e Industria á enerxética de capital chinés se axusta a dereito e determina que non é preciso obter os informes sectoriais dos proxectos antes do trámite de información pública, polo non é preciso obter os informes sectoriais dos proxectos antes do trámite de información pública, un dos argumentos empregado nos autos de paralización de proxectos eólicos polo TSXG.
As entidades asinantes lembran que hai máis de 70 recursos contenciosos-administrativos presentados por distintas asociacións así coma centos de denuncias de particulares polas afeccións ao patrimonio persoal e á saúde. Sosteñen que os argumentos xurídicos que fundamentan estes recursos baséanse en diversos aspectos coma o fraccionamento ilícito ou a afectación a zonas naturais protexidas ou ao patrimonio cultural.
"Que o Supremo non observe que concorran causas de nulidade pola redución á metade do prazo de información pública e por que os informes sectoriais fosen solicitados despois do devandito trámite, non invalida en absoluto os diversos aspectos nos que se fundamentaron os demais recursos presentados contra outros proxectos". Os argumentos xurídicos para paralizar o espolio "son numerosos", remarcan, polo que están dispostos a esgotar todas as vías xudiciais.
Desenvolvemento sostíbel
"No século do ambientalismo e a preservación da natureza é inconcibíbel que en nome da ecoloxía vaiamos permitir esnaquizar centos de quilómetros de flora e fauna en prol dos intereses económicos de grandes corporacións, que unha vez instalados, non terán a menor preocupación polos graves problemas locais que estas macroinstalacións deixarán ao seu paso".
Plataformas ambientais e veciñais aseguran que non se trata só dun problema de "abuso administrativo e litixio xudicial", é, defenden, "un problema de falta de respecto e entendemento á forma de vida que realmente implica o desenvolvemento sostíbel e ecolóxico do noso planeta, que lembramos é un dos obxectivos prioritarios para a Axenda 2030 das Nacións Unidas".