Destapan estafa na Galiza dos contedores 'solidarios' para recoller roupa para @s necesitad@s

Contedores metálicos, rectangulares, e coa imaxe do globo terráqueo gravada neles. Estaban espallados por ducias de barrios, aldeas e vilas da Galiza, presentándose como un portelo á solidariedade. Co simple xesto de depositar neles a roupa que non precisabamos, estabamos a axudar a familias do denominado Terceiro Mundo. Esta era (é) a mensaxe que Humana, responsábel dos contedores, vende. E foi fructífera, pois non era raro ver contedores repletos de bolsas de roupa usada.

Mais, é certa toda a propaganda de Humana? É verdade que esa roupa vai beneficiar a poboacións necesitadas?. Un blogue galego, Contra a seita Humana/Tvind na Galiza, está a poñer en dúbida toda esa versión, e faino achegando estudos, datos, informes e reportaxes feitas en diferentes países. E con conclusións máis que preocupantes: "Ao meter a nossa roupa usada nos contentores de Humana o que de facto estamos fazendo e regalar essas peças a seita Tvind e a The Teachers Group. Nem um euro dos obtidos remata em verdadeiros projetos de desenvolvimento, todo é desviado polo caminho numha rede de empresas da trama Tvind. Os próprios métodos de Humana nos paises em desenvolvimento danam também o tecido económico destes".

Dar a alerta

Segundo a franquicia española de Humana, a roupa que chega aos contedores é dividida segundo a sua utilidade: Unha parte (roupa de calidade en bo estado) iria destinada ás tendas de Humana en Europa onde se convertiría en diñeiro para investir en proxectos de desenvolvemento). Outra parte (roupa en bo estado mais non “na moda”) é enviada aos proxectos Humana. E unha terceira parte é desbotada por inutilizábel. 

Mais diferentes investigacións (desde xornais británicos a administracións alemanas) poñen en dúbida toda esa 'propaganda'. Como afirman no blogue galego: "A principal estrutura do calote de Humana é a de servir de passo intermédio para a limpeça de dinheiro de Tvind. Também é um elo mais no transfer mispricing da orgainzaçom. Em comércio internacional denomina-se assim à fraude consistente em comerciar entre empresas ligadas num truste, fixando os preços de forma que se evitam pagar impostos ou ter que invertir realmente em desenvolvimento".

"Menos do 10% do dinheiro gerado pola venda de roupa em Europa chega aos projetos de desenvolvimento ligados com Humana"

 "Como indicam as investigaçons citadas anteriormente menos do 10% do dinheiro gerado pola venda de roupa em Europa chega aos projetos de desenvolvimento ligados com Humana. O resto dos quartos “disolvem-se” na rede de empresas e serviços de Tvind: Alugueiros demenciais da empresa Argyll Smith & Co (outra parte do entramado de Tvind), gastos injustificados de gestom ou soldos para o quadro de pessoal de Humana que ao ser membros da seita Tvind devolvem como doaçom o ganhado".

Negocio e máis negocio

Prosigue o relatorio do blogue: "A situaçom nom é melhor com a roupa enviada a África, Ásia ou América do Sul: as peças nom se entregam como caridade nestes paises. Como ditaminou a Comissom de Caridade inglesa com o exemplo de Zambia a roupa é vendida de novo por empresas ligadas com Humana nos paises do 3º Mundo convertendo-se numha competência desleal para o mercado e os e as produtoras locais. As roupas importadas assim nom pagam alfándega ao estarem ligadas com umha ONG e causam impato enormemente negativo na economia".