As organizacións Greenpeace, Ecoloxistas en Acción e Amigas da Terra, expresaron conxuntamente o seu rexeitamento á construción da autovía A-57 en Pontevedra e alertaron do "grave prexuízo ambiental e social" que causará a continuación da construción desta "innecesaria" infraestrutura. "Non pedimos un cambio de trazado, pedimos que se descarte por completo a autovía A-57", manifestaron.
Nunha rolda de prensa esta quinta feira en Pontevedra, estes colectivos mostraron o seu respaldo á Plataforma de Afectados pola A-57 nas parroquias de Bora e Xeve para "frear a desfeita ecolóxica e social que causarán estas obras".
Este segundo tramo da coñecida como circunvalación de Pontevedra, entre a Ermida e Pilarteiros, sumou máis de 60.000 alegacións. Manoel Santos, portavoz de Greenpeace, sinalou que "a construción da A-57 é incongruente coas novas políticas de mobilidade que temos que implementar para abordar a emerxencia climática" e engadiu que "non se necesitan máis infraestruturas para seguir queimando combustíbeis fósiles con milleiros de vehículos privados".
Para Greenpeace "este enorme investimento debería dirixirse ao transporte público, por exemplo a trens de proximidade, que si serían unha alternativa viábel e ecolóxica a esta autovía e tamén á AP-9 que din que pretende complementar".
Zona protexida
Estas tres organizacións tamén destacaron que a construción da autovía vai "arrasar" con máis de seis mil metros cadrados de zona protexida pola Rede Natura, afectando especialmente á flora e fauna dos hábitats que conforman este tramo do río Lérez.
Cristóbal López, portavoz de Ecoloxistas en Acción lembrou que "na Galiza non imos sobrados de superficie protexida, polo que a afección é máis grave aínda", xa que o país só ten un 12% de zona protexida pola Rede Natura, o que a sitúa "á cola do Estado neste ámbito".
Adriana Echeverría, portavoz de Amigas da Terra, manifestou que con esta infraestrutura "Pontevedra só cambiará o atasco de sitio, incrementando como dano colateral o seu tráfico perimetral e o castigo ao rural". Tamén destacou que "Pontevedra non é unha illa climática e aos gases de efecto invernadoiro, que é o que temos a urxencia de eliminar, non lles importa emitirse no centro ou na periferia".
Por parte da Plataforma de Afectados pola A-57 en Bora e Xeve, falaron Mari Carmen Tenorio, Ronsel Eirín e Gonzalo Arís, que explicaron que a propia avaliación do Ministerio sinala que a construción e explotación da autovía afectará por centos vivendas con niveis de ruído por encima do permitido, e unha ducia de casas serán derrubadas. Ao mesmo tempo, os veciños e familias veranse afastados uns doutros pola "enorme trincheira" que creará a construción desta infraestrutura. Os veciños afectados piden a políticos "sensibilidade" ambiental e "empatía" coa poboación do rural para frear este proxecto.
