O caudal do río Lérez experimentou unha mellora nos últimos días grazas ás choivas caídas e ao descenso do consumo de auga unha vez concluído o período vacacional do verán coa conseguinte baixada no número de turistas, segundo os técnicos da Xunta, que, con todo, decidiron manter activa a prealerta por seca na conca.
Así llo trasladou a directora de Augas da Galiza, Teresa Gutiérrez, aos concellos do sistema de abastecemento de Pontevedra -Pontevedra, Poio, Marín, Sanxenxo, Ponte Caldelas, Bueu e Vilaboa-, que participaron nunha reunión telemática de seguimento pola situación de escaseza de auga que afecta á conca do Lérez.
Deste modo, apréciase un "lixeiro aumento" do caudal do río nos últimos días debido ás precipitacións e á redución do consumo de auga, especialmente nos municipios costeiros que multiplican a súa poboación e visitantes durante a parte central da estación estival.
Situación sen normalizar
Con todo, a situación aínda non está normalizada, polo que Augas da Galiza decidiu non levantar a prealerta, que permanecerá activa até que o río Lérez recupere máis caudal.
Así, a Xunta reiterou a súa petición ante os concellos do sistema de abastecemento do Lérez para que constitúan un ente supramunicipal encargado da xestión do propio abastecemento.