O centro específico para menores migrantes de Monforte, incendiado e coas xanelas rotas tras o lanzamento de cócteis Molotov
O centro específico para menores migrantes que se ía abrir na Galiza no municipio de Monforte (Terra de Lemos), cedido pola Asociación Prodeme (de apoio e servizos ás persoas con discapacidade intelectual) á Consellaría de Política Social, apareceu incendiado e coas xanelas esnaquizadas este sábado, segundo puideron confirmar a Nós Diario fontes próximas ao centro.
A acción realizouse a través do lanzamento de varios cócteis Molotov (bombas incendiaria de fabricación caseira) a través dunha das xanelas do lateral do edificio que tería causado importantes danos na propiedade de Prodeme cedida para o centro específico para menores migrantes. Os feitos terían acontecido durante a noite, ás 3 horas da madrugada deste sábado, momento no que saltou a alarma.
Todo parece indicar que foi un acto premeditado e intencionado nun centro con capacidade para albergar 80 menores migrantes no municipio de Monforte. Neste sentido, a Policía sinala que unha das bombas incendiarias de fabricación caseira foi lanzada ao interior a través dunha das xanelas do inmóbel, que foi previamente forzada. O outro artefacto quedou no exterior do edificio.
Como consecuencia, a parte do comedor, que foi onde se produciu o incendio, quedou esnaquizada ocasionando numerosos danos materiais, mentres que o resto do edificio está afectado polo fume. Até o punto desprazáronse de madrugada os bombeiros e axentes policiais e durante a mañá deste sábado a Policía Científica para analizar o perímetro e solicitar probas.
En concreto, o baixo está situado no edificio residencial Francisco Suárez que Prodeme ten no municipio e o suceso aconteceu unha semana despois de que a conselleira de Política Social, Fabiola García, anunciase a creación deste centro.
Colaboración do Concello
Segundo indicou o Concello, a Policía conta con imaxes das cámaras nas que se visualiza a varias persoas no exterior. Ademais, están a ser analizadas mensaxes que circulaban previamente por redes sociais nas que se afirmaba, de forma claramente racista contra as persoas menores migrantes, que "isto arránxase con gasolina".
O alcalde de Monforte de Lemos, José Tomé Roca (PSdeG), condenou "taxantemente" un ataque vandálico que "parece un atentado". "Unha sociedade pacífica como a monfortina non pode nin debe admitir actos como este", sinalou.
A raíz do sucedido, o alcalde convocou unha xunta de voceiros a próxima segunda feira ás 9 horas con todos os grupos da Corporación municipal para propor un "rexeitamento unánime" de todos e todas as concelleiras.
O rexedor, que visitou o edificio para comprobar os danos, púxose en contacto co xerente de Prodeme, Julio Cortiñas, a quen mostrou a solidariedade do Concello, póndose á súa disposición. Así mesmo, comunicouse co xefe da Policía e ofreceu colaboración no esclarecemento dos feitos para "dar cos responsábeis e que a Xustiza caia sobre eles".
