O BNG presentou unha declaración institucional e unha proposición non de lei na que demanda ao Parlamento e á Xunta que se posicionen en relación co Pazo de Meirás, instándoos a pedir a súa "devolución" ao ámbito público e declarando tanto a familia Franco como a Fundación Francisco Franco "non gratos" en Galiza. "É o mínimo que se pode pedir", asegurou.
O deputado nacionalista Luís Bará reclamou que sexa o Parlamento de Galiza quen lidere un "chamamento a todas as institucións" para que se adhiran á plataforma creada "en prol da devolución do pazo". O BNG insta o Parlamento e Xunta a apoiar a declaración aprobada polo Concello de Sada pedindo xestionar desde o ámbito municipal as visitas a este espazo, así como que "se impida a entrada da Fundación Francisco Franco neste enclave".
"Xenocidio de católicos"
A Fundación Nacional Francisco Franco emitiu un comunicado no que afirma que "Franco non fusilou ninguén" e que entre as funcións da entidade está a defensa de "vítimas" da Fronte Popular ao tempo que fala dun "xenocidio de católicos".
A Fundación criticou as peticións de ilegalización da entidade e asegura que o ditador "ofreceu aos caídos da Fronte Popular a maior dignidade que estaba na súa man", a de "durmir o soño eterno baixo a cruz do Val dos Caídos".