A Festa da filloa da pedra da Baña xa ten data... e un cartel de luxo: consulta aquí a programación completa
O Concello da Baña, na comarca da Barcala, mostrará en público outro ano máis, e xa serán 21, o seu agarimo e respecto pola súa gastronomía tradicional. Faino a través da Festa da filloa da pedra, un dos pratos máis singulares que caracteriza este municipio do rural galego, un evento que decorrerá o 16 de febreiro no Pavillón de San Vicenzo da localidade.
Na presentación da programación, realizada esta quinta feira na Aula Gastronómica da Praza de Abastos de Compostela, a concelleira de Acción Social, Cultural e Servizos á Cidadanía, Mónica González, explicou as novidades desta edición así como o cartel coas actuacións e as actividades previstas.
“Pensamos que as filloas fan unha boa maridaxe con distintos eidos como son o deporte, a literatura, a artesanía e a música, polo que a programación tivo en conta todos estes elementos", comezou sinalando González. Neste sentido, por primeira vez, a festa terá unha ruta ciclista (10 horas). “Iso si, unha proba non competitiva e que agardamos que teña continuidade”, aclarou a edil. Outra novidade é a introdución da presentación dun libro, neste caso a obra Ben mantidos (Editorial Galaxia), de Xavier Castro, un traballo que “relaciona moi ben a gastronomía co país e ten moito a ver con esta festa”.
Un elemento que tampouco faltará nesta ocasión será o da artesanía, un apartado que a organización quere que teña o seu propio protagonismo. “Ademais do torno de ballesta e a elaboración de sancosmeiros doutros anos, esta edición haberá un zoqueiro” traballando en directo, comentou González, “coa posibilidade de atopar, como sempre, outros produtos artesanais, desde xoguetes até roupa, engadindo o gastronómico, con queixos e embutidos”, agregou.
A música
Sen música non hai festa, e a organización seguiu esta idea engadindo, a maiores do tradicional concerto, unha sesión vermú. O responsábel da programación musical, Emilio Lois, admitiu que este ano "queremos que haxa música durante toda a xornada, até o seu remate".
As actuacións comezarán ás 12 horas con "varios grupos da localidade, como as pandeireteiras e unha coral que forma parte da Escola de Música Tradicional da Baña", para dar paso, despois, ao pregón a cargo de Alonso Caxade. Despois actuarán, a partir das 13.30 horas, o Trío Alborada, 7 Ferrados e Os Carunchos. A fin de festa será, a partir das 19.30 horas, unha actuación das Fillas de Cassandra. "Pensamos nelas para chegar a un público diferente ao habitual deste tipo de festas, con idades que poden ir desde os 13 até os 15 anos", confesou Lois.
Caxade e A Baña
"Temos unha relación moi especial con Alonso Caxade", descubriu Mónica González, "a maior parte de vós coñecedes a súa faceta musical mais nós, ademais, coñecémolo pola súa faceta profesional como mestre titular na única escola rural que segue activa no noso municipio, a da parroquia de Lañas", relatou a concelleira bañense.
Este ano estarán en funcionamento trinta pedras, aínda que xa se comezarán a facer as filloas o día anterior en previsión da grande afluencia de visitantes que tivo outros anos. A filloa da pedra é un produto de moita tradición na comarca. A elaboración é singular por realizarse sobre un ferro de pedra, máis concretamente granito gris, que precisa estar no lume varias horas antes de empregarse.
