Galiza rexistrou máis de 4.000 lóstregos na xornada desta segunda feira, unha actividade que se concentrou no interior e norte do país, segundo os datos feitos públicos por Meteogaliza, dependente da Consellaría de Medio Ambiente, Territorio e Vivenda.
Así, nesa xornada rexistráronse no territorio galego un total de 4.312 lóstregos, a maior parte concentrados á primeira hora da tarde.
Esta actividade continuou, aínda que de forma menos intensa, nas seguintes horas.
Segundo informou Meteogaliza, na madrugada desta terza feira (até as 8 horas) o número de lóstregos rexistrados foi de 82, con actividade concentrada no suroeste do país.
Segundo as previsións deste organismo, esta terza feira Galiza está nunha situación intermedia entre as altas e as baixas presións.
O ceo estará parcialmente cuberto, con chuvascos repartidos irregularmente por todo o territorio e que irán remitindo conforme avancen as horas.
Temperaturas
Con respecto ás temperaturas, a mínima rexistrouse en Lugo, con 12 graos. Os valores máximos oscilarán entre os 25 graos de Ourense e Pontevedra, e os 22 graos de máxima previstos na Coruña.
