Eran comezos dos 90 e Compostela bulía en proxectos e ambiente no que a autoxestión era compromiso obrigado. Agromaban desde selos discográficos autoxeridos e 'underground' até experiencias okupas. Un fervedoiro no que naceu Radio Calimero, xa posteriormente A Kalimera, collendo o nome do poliño negro dos debuxos animados. Comunicar, democratizar a palabra, sinalan os seus responsábeis, como obxectivos. Recollendo en certo xeito o relevo daquela Radio Alice que nos 70 revoltaba Italia. Case nada.
“Durante estes anos foron moitas as persoas, as ideas, as músicas, os ruidos e as historias que vixaron polas ondas da cidade a través do 107.9FM”, sinalan desde a emisora. “Tamén foron moitas as rúas e espazos polos que esta radio pasou”. Desde o barrio de Vite e os barracóns daquel Burgo Vello até a Casa Encantada do barrio do Sar, pasando pola Gentalha do Pichel.
A Kalimera enceta unha nova etapa e múdase ao Centro social autoxestionado de Sar, a Casa do Peixe. Un pulo que precisa de novo equipo técnico e finiquitar de vez débedas pendentes. De aí o impulso a unha campaña de microfinanciamento. “Ademais de apoiar a redio e o seu proxecto hai recompensas ben gorentosas, como kits de construción de emisoras portátiles, libros, cursos...”. A meta, chegar aos 3.735 euros antes do 9 de xuño.
Se queres saber máis da campaña, que se chama 'IOndiñas veñen e van', aquí tes uns vídeos.