O Parlamento proclama Rueda presidente da Xunta co único apoio do PP e a crítica da oposición pola falta de proxecto propio

Sen sorpresas. Alfonso Rueda foi elixido onte no Parlamento galego presidente da Xunta da Galiza co apoio dos 40 deputados e deputadas do PP, o voto en contra dos 25 representantes do BNG e 9 do PSdeG; e a abstención do único deputado de Democracia Ourensá. A votación, a media tarde, poñía o ramo ás dúas xornadas do debate de investidura. Se a primeira foi de exposición do até onte candidato á Presidencia do seu programa para os vindeiros catro anos, a de onte foi de valoración do mesmo polos grupos parlamentarios. "Goberno alternativo" "Imos facer un rigoroso labor de control [do Executivo galego] pero, ao mesmo tempo actuaremos como Goberno alternativo. A cada crítica achegaremos unha solución explicando que faría un Goberno do BNG para mellorar a vida da cidadanía". A portavoz nacionalista, Ana Pontón, erixiu na súa intervención o BNG como a forza que vai garantir a defensa "dos galegos e galegas fronte a un Rueda "sen proxecto de futuro, que repite o mesmo de sempre". Pontón comprometeu unha "política de luces longas" e ofreceu acordos en materia de sanidade, vivenda, modelo enerxético e "rexeneración democrática". "Non desprece a man tendida", pediu a Rueda a quen instou a "afrontar os problemas" que ten a Galiza e non ser "un refén de Xénova [sede do PP español]. " Por unha vez escoite, dialogue e teza acordos, lonxe da crispación". Pontón tende a man a Rueda pero rexeita o seu pacto pola industria, que ve asentado no "espolio" A portavoz nacional da formación nacionalista defendeu maior autogoberno e un financiamento "no que ter a chave dos nosos cartos para xestionar cada euro desde aquí". Lamentou que no seu discurso de investidura Rueda non ofrecese propostas en materia de igualdade e que, por veces, o discurso abeirase máis un "manual de demagoxia" que un programa realista O discurso de Pontón tivo referencias aos sectores produtivos e á necesidade doutro modelo enerxético —"Pode explicarnos por que na Galiza entre 2009 e 2023 temos 4.000 muíños nos montes e 27.600 empregos menos na industria pero en Madrid cero muíños e 21.400 empregos industriais máis?—. mais finalizou desexando a Rueda"acertos como presidente", pois "redundarán en beneficio da Galiza e o BNG quere o mellor para os galegos" Besteiro reivindica unha "Galiza protagonista" e propón cinco acordos de país para "avanzar" "Sen ambición de país" José Ramón Gómez Besteiro lamentou a aposta de Rueda no seu discurso da terza feira pola "confrontación" co Goberno español, ao tempo que anunciaba por parte do PSdeG unha oposición "responsábel e construtiva". O portavoz socialista recoñeceu que Rueda "ten os votos para ser un lexítimo presidente" mais considera que carece da "ambición de país que é imprescindíbel para ser bo presidente". Ao igual que Ana Pontón, Gómez Besteiro tendeu a man ao presidente para alcanzar acordos en cinco temas, no seu caso, vivenda, plan de contratación na sanidade, enerxía e industria; acordo local e o galego. Para facer unha radiografía da situación da Galiza, o socialista recorre a unha parella imaxinaria ("duns 30 anos, cunha nena pequena") e as dificultades que atopan no seu día a día, desde para acceder a unha vivenda atopar unha gardería pública. "Entre a Galiza e o partido socialista non dubidaremos en elixir a Galiza. Pídolle o mesmo, que entre os intereses do PP de Madrid e a Galiza, elixa a Galiza", pediu a Rueda, ao que lle dixo que o PSdeG "ten vocación do Goberno e iso tamén se demostra cando non gobernas". O único deputado de DO centrou os seus 35 minutos de intervención (o mesmo tempo que tivo o BNG e o PSdeG) en enumerar "marxinacións" de Ourense en sanidade, infraestruturas ou mesmo turismo. "Votáronme para denunciar esas discriminacións", concluíu. CRÓNICA | Rueda promete para a Galiza "da próxima década" as mesmas receitas que nestes 15 anos O portavoz na Cámara do PP, Alberto Pazos Couñago, acusou a oposición de non dixerir os resultados do 18-F ("continúan coas mesmas críticas e a mesma demagoxia") e fechou a porta á oferta de pactos do BNG e PSdeG: "Rueda presentou nas eleccións un programa con 860 compromisos e foi avalado polos galegos, e ese [o programa] debe ser o marco do diálogo". Rueda Alfonso Rueda aproveitou a súa quenda de reposta aos grupos parlamentarios para ensanchar máis o camiño de crítica á oposición que principiara Pazos Couñago. "Pasaron dous meses das eleccións e non entenderon o resultado electoral", afirmou, para a seguir apelar a Gómez Besteiro a que "se p,ante" ante o BNG pois iso "sería bo para a Galiza e para unha oposición construtiva" e poder ir así, dixo, "recuperar o voto prestado" que, dixo, o PSdeG fixo ao nacionalismo o 18.-F. Pola contra, cargou con dureza contra Ana Pontón. Para el, vai ser "difícil" ter algún tipo de entendemento nesta lexislatura cun BNG con posicionamentos como os que ten a respecto de Altri e os eólicos; ou ao que sitúa en clara belixerancia contra o bilingüismo. Finalizado o debate a após a votación na Cámara, as 18:12 horas o presidente do Parlamento, Miguel Santalices proclamaba Alfonso Rueda presidente galego. Altri e AP-9 tiveron presenza propia na sesión O proxecto de Altri para Palas de Reis (A Ulloa) saíu á colación varias veces ao longo do debate de onte e por boca dos diferentes participantes. "Non imos permitir que nos colen como industrialización o que é unha agresión ambiental descomunal", asegurou Ana Pontón, que diferenciou entre o que debe de ser "industrializar" Galiza e "contaminar e hipotecar o futuro do país". Para Gómez Besteiro hai a sensación "de que aquí houbo cousas raras" e Altri, da que se dicía que "ía ser boísima, crear 2.500 empregos..." agora semella ser outra cousa. Non gostaron a Rueda estas críticas ao proxecto de celulosa para A Ulloa. O candidato á Presidencia afirmou que no seu día varios ministros e mesmo o propio Pedro Sánchez mostraron o seu aval ao proxecto previsto para desenvolver en Palas de Rei. A respecto da AP-9, Alfonso Rueda quixo postularse como grande defensor do seu traspaso. "Imos os tres a Madrid, a segunda feira se queren" para pedir a gratuidade da vía, díxolle a Besteiro e Pontón. A portavoz nacionalista lembrou o PP a súa responsabilidade na privatización da xestión da autoestrada e concluíu que "fai falta valor para falar da AP-9" estando no PP. Besteiro, pola súa parte, insistiu en que apoiaban o traspaso da infraestrutura.

O Parlamento proclama Rueda presidente da Xunta co único apoio do PP e a crítica da oposición pola falta de proxecto propio

O PP nútrese de Ciudadanos e UPyD para concorrer ás eleccións ao Parlamento Europeo

A actual Lei de prensa e imprenta do Estado español foi aprobada en 1966 baixo o franquismo

Besteiro reclama que a Xunta se "poña as pilas" para que a Galiza "non perda oportunidades" en materia industrial e de emprego

Pontón urxe o Goberno español a derrogar as reformas que "roubaron dereitos" aos traballadores e traballadoras

Cando Feixoo anunciou un período de silencio e reflexión: tres días sen acudir a actos públicos como presidente da Xunta

Visto e prace da Xunta Electoral a ‘Agora Repúblicas’ e outras 9 coalicións para as eleccións europeas

A transparencia das axudas públicas aos medios, chave para a rexeneración democrática

O PP da Illa de Arousa recupera un edil cunha condena anterior por violencia machista: Só "cometeu un erro"