Orzamentos 2024: a Xunta bota o freo ás partidas sociais

O Consello da Xunta da Galiza aprobou esta cuarta feira o proxecto de Orzamentos para 2024, unhas contas que mañá serán entregadas no Parlamento galego para iniciar así un trámite parlamentario que permita —tal e como prevé no seu calendario o Executivo que preside Alfonso Rueda— a súa aprobación antes de que acabe o ano. "Aprobaremos os orzamentos en tempo e forma", afirmou o conselleiro de Facenda, Miguel Corgos, na presentación do proxecto após o Consello da Xunta. A mesma frase que empregou Rueda momentos antes e a mesma que ambos os dous xa empregaran en 2022 na presentación das contas para 2023. Un "tempo e forma" que, ademais, conselleiro e presidente contrapoñen á "inestabilidade" orzamentaria que afirman que se dá no Estado español. Mais esta expresión non é a única que Rueda e Corgos dixeron e que xa eles propios repetiron en anos anteriores. "Son uns orzamentos de récord" e "as contas máis altas da historia da Galiza" volveron estar esta cuarta feira no argumentario do Goberno galego. O proxecto de Orzamentos para 2024 esgota o teito de gasto —que foi aprobado esta cuarta feira na Cámara galega cos votos en solitario do PP antes de ter lugar a reunión do Consello da Xunta—: 13.257 millóns de euros, un aumento de 5% a respecto do de 2023. "Aumentamos o gasto social", manifestou Alfonso Rueda. "Modernizaremos o sistema de benestar e melloraremos os servizos públicos", acrecentou o conselleiro. Porén, esas contas para 2024, as "máis altas da historia" da Galiza en números absolutos adoecen cando se comparan coas de 2023 tendo en conta o aumento da inflación no presente exercicio. Por exemplo, en sanidade. Para 2024 o proxecto de contas aprobado polo Goberno galego prevé investir 5.165 millóns. Son 197 millóns máis que o que destinan os orzamentos en vigor, que contemplaban unha partida para sanidade de 4.967 millóns de euros. Mais se a esa cifra aplicamos o incremento da inflación, que para 2024 prevé o Instituto Galego de Estatística —órgano cuxas estatísticas e datos a Xunta emprega para elaborar as contas—, 5,4%, esa partida debería ser 253 millóns maior, e non 198 como é. A Airef corrixe á baixa as previsións da Xunta para as contas de 2024 Ensino e emprego Igual escenario se dá no orzamento consignado para o ensino ou o emprego, outros dos alicerces que a Xunta enmarca no seu "gasto social". Ao ensino público consígnaselle para 2024 un total de 2.858 millóns de euros, 63 máis que para 2023. Mais, de aplicar a suba da inflación, ese incremento debería ser para o vindeiro ano de 150 millóns máis co fin de situarse no mesmo nivel de esforzo que en 2023. Os orzamentos en vigor contemplan unha partida para emprego de 443 millóns de euros. Os aprobados esta cuarta feira, para 2024, 448 millóns, apenas 5 millóns máis. A suba prevista de 5,4% da inflación ao fechamento de 2023 faría necesario que, para seguir no mesmo compromiso orzamentario co emprego, a partida aumentase 23 millóns de euros, e non cinco. O conselleiro de Facenda reiterou que a Xunta mantén a súa política de fiscalidade que aposta por manter rebaixas (como a do imposto do patrimonio, do que se benefician as grandes fortunas) e recortar novos tributos. El mesmo volveu dicir esta cuarta feira que esas políticas de rebaixas en impostos fixeron que a Xunta deixase de ingresar no que vai de lexislatura ao redor de 1.300 millóns de euros. A Xunta manterá en 2024 a rebaixa en patrimonio que beneficia as grandes fortunas Universidade e concellos Corgos debullou na súa comparecencia o importe que se vai destinar no próximo exercicio a diversas partidas, como os 508 millóns de euros para universidades ou os máis de 600 millóns a concellos —a Federación Galega de Municipios e Provincias— xa expresou o seu desacordo esta terza feira coas previsións que da Xunta sobre o Fondo de Cooperación Local. Ao bono de coidado de 5.000 euros para familiares de persoas con dependencia severa destinaranse 97 millóns e á teleasistencia para persoas maiores, 9,6 millóns; segundo o conselleiro. O fomento da mobilidade sostíbel levará 14,7 millóns; o bono deportivo 16,2 millóns e o acompañamento no acceso á vivenda para persoas sen fogar, 2,5 millóns; segundo avanzou o titular de Facenda. Durante o debate sobre o teito de gasto na Cámara galega, Miguel Corgos lembrou as previsións macroeconómicas que manexa o Executivo para 2024 e que prevé un incremento do PIB de case 2%, así como seguir reducindo a taxa de paro, que augura que cando finalice o vindeiro ano estará en 9,4%. "En 2024 encadearemos catro anos consecutivos de crecemento económico manifestou". O conselleiro tamén fixo fincapé en que nos Orzamentos para 2024, "por primeira vez en 17 anos" non se recorrerá ao endebedamento. Algo que, por certo, deben de cumprir todas as comunidades, pois só o Estado pode endebedarse, e non máis de 3%, por mor dunha disposición da Unión Europea. Ana Pontón: "As mesmas receitas fracasadas" A portavoz nacional do BNG, Ana Pontón, mostrouse convencida de que con estes orzamentos "non se vai frear o fechamento de industrias, nin acabar coas listas de espera, nin mellorar o sistema de atención a maiores, nin impulsar a ciencia, nin loitar contra o cambio climático, nin evitar a emigración de mozas". O BNG ve "raquítico" o teito de gasto da Xunta para 2024 Para a nacionalista, o Goberno galego volve apostar por "receitas fracasadas" nunhas contas "inservíbeis" para mellorar os servizos públicos, axudar as familias e fortalecer os sectores produtivos. Ademais, denunciou que malia a "propaganda" dos orzamentos "máis altos", os Gobernos do PP deixaron sen investir "3.154 millóns [das contas] de euros entre 2019-2022". Por último, a líder da oposición considerou que Alfonso Rueda leva semanas "facendo promoción persoal como candidato" e "con esa finalidade está a utilizar o cargo como presidente e os orzamentos son unha peza chave desa estratexia". Luís Álvarez: "Rutineiros" Pola súa parte, Luís Álvarez (PSdeG) criticou o "carácter rutineiro" que, ao seu xuízo, dá a Xunta da Galiza aos orzamentos. Neste sentido, o socialista censurou as baixadas de impostos e asegurou que é "cínico" que de forma paralela reclamen máis fondos ao Estado español. Ademais, Álvarez criticou que o Goberno galego empregue os orzamentos como recurso para darlle “soporte económico á campaña electoral do PP para as próximas eleccións” e reivindicou “apostas comprometidas” para os sectores sociais e produtivos en dificultades. PXOM de Vigo Na reunión do Goberno galego que decorreu esta cuarta feira tamén se aprobou unha nova prórroga —a cuarta— ao convenio co Concello de Vigo para a elaboración do Plan Xeral de Ordenación Municipal (PXOM). Por outra parte, a preguntas da prensa sobre a negativa a apoiar a declaración da Coruña como zona tensionada polo prezo da vivenda e sobre se ía dar esa mesma negativa á petición que prepara nesa liña o Concello de Compostela, Rueda dixo que con esas declaracións de zonas tensionadas "non se solucionada absolutamente nada".