O PP fía as súas posibilidades nas galegas a un trunfo de Feixoo nas estatais

A decisión de Pedro Sánchez de adiantar as elección estatais ao 23 de xullo colleu todas as formacións políticas a contrapé. Neste contexto, explícase a sorpresa xerada pola súa decisión no PSdeG, cuxa dirección vese obrigada a mudar a súa orde de traballos inmediatos e, moi particularmente, a súa planificación de cara ás eleccións galegas. A este respecto, preocupa que a chamada ás urnas e un cambio na composición do Goberno do Estado deixe sen proxección pública José Ramón Gómez Besteiro, actual delegado do Executivo español na Galiza e proposta máis probábel da cúpula do PSdeG á Presidencia da Xunta da Galiza. O PP avanza no Estado español e Bildu supera o PNV A primeira consecuencia da convocatoria electoral de xullo afecta o proceso de escolla do candidato socialista para as galegas. Nesa liña, as fontes do PSdeG consultadas por Nós Diario apostan por adiar as primarias, previstas para despois dos comicios locais, para o mes de setembro. Un proceso de elección do presidenciábel con Pedro Sánchez fóra da Moncloa daría máis poder de decisión ás bases socialistas galegas e restaría capacidade de influencia ao aparato de Ferraz. Porén, o seu desenvolvemento no marco dun retroceso electoral xeneralizado provocaría máis tensión interna e daría máis posibilidades aos candidatos alternativos. Sexa como for, Besteiro e o ex secretario xeral do PSdeG, Gonzalo Caballero, semellan chamados a enfrontarse pola candidatura á Xunta. Os riscos do PSdeG Os socialistas galegos non as teñen todas consigo para os comicios de xullo pero consideran atinado o adianto lectoral. Nesta perspectiva, entenden que as realizacións das eleccións coincidindo coa sinatura de acordos entre PP e Vox para repartirse os Gobernos de concellos e comunidades autónomas pode favorecer unha mobilización do electorado de esquerdas e a súa concentración nas candidaturas do PSOE. O PP espera contar co apoio de ACIP para gobernar Ponteareas en maioría Así, o chamado ao voto útil será o principal reclamo dos socialistas durante a campaña das estatais. Porén, existen moitas dúbidas de que abonde para parar a dereita no espazo español. A este respecto, as fontes do PSdeG contactadas por Nós Diario son conscientes da existencia dunha conxuntura electoral complicada. As certezas do PP O Partido Popular parte con vantaxe para as eleccións do 23 de xullo, mais a súa posición na Galiza é máis débil que no ámbito español. Os propios resultados dos comicios do 28 de maio certifican esa tese, até o punto de non estar en disposición de sumar unha maioría suficiente no país. Isto explicaría, en opinión de socialistas e nacionalistas, a negativa de Alfonso Rueda a facer coincidir eleccións galegas e estatais, que defendían outros membros da formación e, moi particularmente, as persoas máis próximas no Executivo da Xunta a Alberto Núñez Feixoo, como o vicepresidente primeiro, Francisco Conde. Os populares consideran intelixente a decisión de Pedro Sánchez de chamar ás urnas en xullo. Segundo os dirixentes do PP consultados por Nós Diario, isto permitiría ao líder socialista librarse dun conflito interno ligado á análise dos resultados das eleccións do 28 de maio, mais tamén expresaría a convicción do presidente sobre a imposibilidade dun trunfo da súa formación neses comicios. Neste sentido, amósanse convencidos dunha gran vitoria electoral do PP en xullo e da chegada de Núñez Feixoo á Moncloa co apoio de Vox. A este respecto, cuestionan que a formación da ultradereita xere medo no electorado español, limitando o impacto negativo dese acordo a Catalunya, Euskadi e Galiza. O PP dos Brancos, cuxo número 3 está condenado por violencia doméstica, gaña un edil A dirección do PP da Galiza entende que un trunfo do PP nas estatais e un Goberno de Núñez Feixoo favorece as súas posibilidades de cara aos comicios galegos do vindeiro ano. Neste sentido, maniféstanse convencidos de que isto contribuiría a sacar adiante proxectos importantes para o país actualmente paralizados e, de forma moi especial, representaría un grande avance para aqueles ligados aos fondos Next Generation. A debilidade de Sumar Sumar ten por diante un papel complicado. Onte mesmo, Yolanda Díaz deu o paso de legalizar a súa plataforma como un partido instrumental de cara a facilitar a confluencia do espazo político á esquerda do PSOE. Nesta dirección, avanzaron nas súas redes sociais que aspira a "ser a casa grande da democracia", onde se unan "todas as formacións políticas que compartan o proxecto de país para a próxima década", para garantir “unha maioría progresista” e "enfrontar o reto da emerxencia climática e avanzar cara a unha sociedade máis libre, máis feminista e máis igualitaria". Os vimbios para articular esta alternativa na Galiza son febles. Os resultados das eleccións locais deixaron fóra das corporacións das cidades o seus posíbeis parceiros, coa excepción de Compostela e Ferrol, onde a militancia Esquerda Unida conta cunha presenza relevante. A maiores, segue sen concretarse un acordo entre a xente de Yolanda Díaz e Podemos, malia a disposición favorábel a este pacto da formación morada na Galiza, e a conformación final das candidaturas pode xerar discrepancias entre os diversos actores do proxecto. A alcaldesa de Boimorto do PP mantén a súa maioría absoluta após a polémica pola súa vacinación contra a Covid Neste sentido, mantense a incógnita sobre o cabeza de cartel na circunscrición da Coruña, onde soan os nomes de Marta Lois e Antón Gómez-Reino, que xa expresou a súa vontade de continuar outra lexislatura. Os resultados das locais darían catro escanos ao BNG no Congreso español O Bloque Nacionalista Galego concorrerá ás eleccións do 23 de xullo co obxectivo de lograr un grupo parlamentario galego no Congreso dos Deputados. Precisamente, esta posibilidade sae reforzada dos comicios do pasado domingo, onde a formación nacionalista rexistrou unha importante suba e obtivo uns resultados que, trasladados a unhas eleccións estatais, permitiría ao BNG conseguir representación nas catro circunscricións electorais galegas. Neste sentido, unha extrapolación dos resultados das locais ás estatais outorgaríalles un escano pola Coruña, outro por Lugo, un terceiro por Ourense e un cuarto por Pontevedra. No BNG opinan que o traballo desenvolto en Madrid durante esta lexislatura serviu para evidenciar socialmente a necesidade de contar cun grupo galego no Congreso. Nesa dirección, entenden que os únicos dous escenarios posíbeis a partir do 23 de xullo son un Executivo do PP e Vox e outro do PSOE condicionado polas forzas nacionalistas de Catalunya, Euskadi e Galiza, polo que destacan a importancia dunha representación ampla para decidir a favor do país. O retorno do BNG ao Senado A lexislatura que se abre após os comicios do 23 de xullo significará a volta ao Senado do BNG. Así, o Parlamento da Galiza deberá elixir tras esa data o nome dos catro senadores de designación autonómica. Correspondénlle 3 ao PP e 1 aos nacionalistas, na súa condición de segunda forza da Cámara galega. A esta altura, o BNG non ten nada decidido ao respecto.

O PP fía as súas posibilidades nas galegas a un trunfo de Feixoo nas estatais

Cando Feixoo anunciou un período de silencio e reflexión: tres días sen acudir a actos públicos como presidente da Xunta

Visto e prace da Xunta Electoral a ‘Agora Repúblicas’ e outras 9 coalicións para as eleccións europeas

A transparencia das axudas públicas aos medios, chave para a rexeneración democrática

O PP da Illa de Arousa recupera un edil cunha condena anterior por violencia machista: Só "cometeu un erro"

Nicolás González Casares ocupará o número 11 na lista do PSOE para as eleccións europeas

Néstor Rego: “É o momento de declarar nula a concesión da AP-9”

Sumar di que se oporá, “como parte do Goberno español” ao proxecto de Altri

A CRÓNICA | O día no que Pedro Sánchez decidiu continuar como presidente do Goberno español