A eurodeputada do BNG Ana Miranda explicou esta sexta feira que presentará unha serie de iniciativas, entre elas unha petición de reunión urxente coa presidenta do Parlamento Europeo, despois de que Israel lle denegase esta terza feira a entrada cando formaba parte dunha delegación da Cámara europea que ía visitar os territorios ocupados palestinos.
Miranda destacou nunha rolda de prensa na sede do BNG en Santiago que "hai que pedir explicacións Israel, xa que non pode interferir nas decisións do Parlamento Europeo" e insistiu en que estes feitos "son un precedente que non se pode repetir".
Deste modo, explicou que aínda que xa se presentaron algunhas iniciativas, entre os seguintes pasos están solicitar unha reunión urxente coa presidenta do Parlamento Europeo, Roberta Metsola, e enviar un comunicado ao departamento de relacións con Israel desta institución europea "para saber os motivos de non defender un dos seus membros".
Nesta liña, Miranda pedirá no pleno europeo levar a cabo "unha declaración de exercicio libre sen interferencias de terceiros países" e solicitará, tanto ao Parlamento Europeo como ao Executivo español, "unha condena total a esta arbitrariedade que impide o exercicio dunha función internacional".
Así mesmo, puntualizou que a primeira declaración institucional na Galiza de apoio "aprobouse en Rianxo" e puntualizou que "non é unha defensa do BNG, senón a unha representante electa democraticamente do Parlamento Europeo".
Ademais, Miranda agradeceu "de forma emotiva, o apoio, agarimo, recoñecemento e solidariedade" tanto a súa organización, como de persoas particulares e institucións. Así, apuntou que "só faltou o apoio do Goberno galego".
A eurodeputada do BNG detallou que chegou a Israel a pasada terza feira día 20 sobre as 20:30 horas, como parte da delegación de Palestina do Parlamento Europeo e que contaba cunha autorización do Ministerio de Exteriores de Israel para entrar no país.
Miranda explicou que estivo "nove horas" no aeroporto israelí e que despois "a devolveron no primeiro voo a Madrid", por "decisión do Ministerio de Interior israelí ás 1:30 horas da mañá". Así, resaltou que isto "evidencia que trasladan as súas propias discrepancias para expulsar un membro do Parlamento Europeo".
Deste modo, apuntou que isto se suma ao choque entre Israel e a Eurocámara polo xefe da delegación aos territorios palestinos, o eurodeputado de Izquierda Unida, Manu Pineda, que non recibiu o visto e prace das autoridades israelís para realizar a visita.
Efay
Na rolda de prensa tamén estivo presente unda delgación da EFAY (Alianza Europea Xuvenil pola Liberdade, polas súas siglas en inglés) na cal se encontra mocidade de diferentes nacións como Escocia, Irlanda ou Bretaña.
A delegación foi convidada pola organización xuvenil do BNG, Galiza Nova, representada pola súa secretaria xeral, Marta Gómez.
