Unha delegación do Parlamento Europeo dirixíase esta terza feira a Palestina coa eurodeputada do BNG, Ana Miranda, entre a pasaxe case oito anos despois de ser deportada polas autoridades de Israel cando viaxaba rumbo a Gaza, en 2015, para ofrecer axuda humanitaria da man do buque Marianne, da III Flotilla Liberdade.
Aquel suceso foi agora o pretexto dunha nova retención e expulsión de Miranda, a pesar de que nesta ocasión viaxaba como representante das institucións comunitarias, nomeadamente a Eurocámara, e contaba cunha autorización expresa tanto da UE como do propio Ministerio de Exteriores israelí.
"Son as 4.30h [3.30h na Galiza] e Israel non me deixou entrar despois de máis de seis horas agardando por unha decisión", informou a parlamentaria nas súas redes sociais, instantes despois de coñecer unha decisión que o Estado de Israel adoptou "malia a presión diplomática da UE, da súa delegación en Xerusalén e do gabinete de Presidencia". "Despois de varias chamadas, non houbo maneira", lamenta.
‼️Deportada por Israel!. Despois de moitas horas de agarda dende as 21h, Israel non me permite a entrada como membro da Delegación de Relacións con #Palestina do #ParlamentoEuropeo. Son case as 5 da mañá e expúlsanme no primeiro voo a Madrid ⤵️ pic.twitter.com/P6nBStgkdx
— Ana Miranda (@anamirandapaz) February 21, 2023
Ana Miranda denuncia publicamente que, "con total impunidade", Israel decide máis unha vez un membro do Parlamento Europeo. "Expúlsanme por vir a Palestina e defender os dereitos do pobo palestino. Mais non lles teño medo e non pararei de facelo", advirte.
No marco desta visita institucional programáranse diferentes reunións diplomáticas en relación ás políticas de reasentamento e demolicións que está a executar o Goberno israelí e que foron denunciadas en distintas resolucións do Parlamento Europeo e da ONU. Ao longo deste roteiro, Ana Miranda tiña previsto visitar Xerusalén, Ramalah, Nablus e Gaza.
Os encontros abarcarían eidos políticos e sociais, como as ONG que traballan na defensa dos dereitos humanos ou os partidos políticos palestinos, así como o ministro de Exteriores de Palestina, Riyad al-Maliki. Os sindicatos de xornalistas ou a Axencia das Nacións Unidas para os Refuxiados de Palestina en Oriente Próximo (UNRWA), que traballa no campo de refuxiados de Nablus, recibirían tamén a Miranda.
A delegación está encabezada pola eurodeputada dos Verdes-ALE Margrette Auken e conformada por catro grupos parlamentarios representados en Estrasburgo e Bruxelas.