Martín Seco (PSdeG) acudirá á xustiza se os órganos do partido deciden expulsalo do grupo parlamentario

O deputado asegura que rematará a lexislatura no seu posto.
O deputado do PSdeG no Parlamento galego Martín Seco. (Foto: Europa Press)
photo_camera O deputado do PSdeG no Parlamento galego Martín Seco. (Foto: Europa Press)

O aínda deputado do PSdeG Martín Seco prevé seguir no Parlamento galego até que finalice a lexislatura e, dado que non ve "motivos" para ser expulsado do grupo socialista ao entender que non cuestionou directrices da dirección, deu a entender que, se os órganos internos da formación política non o avalan, irá "á xustiza" para obter "a razón".

"Non existen motivos para ese expediente, o meu comportamento é completamente irreprochábel, e o que pon non se corresponde coa realidade. Creo que oíndo a miña intervención pódese demostrar, e estou a esperar con toda a tranquilidade posíbel para que se analicen os feitos", indicou Seco en declaracións aos medios nos corredores da Cámara.

O deputado foi expedientado pola actual dirección do PSdeG despois da súa intervención na Cámara do pasado mes de setembro, cando os socialistas votaron a favor da Lei de áreas empresariais xunto ao PP. Desde a tribuna do hemiciclo, Seco mostrouse crítico entón co contido desta norma e xustificou o voto favorábel porque así o ordenaba "a dirección política do partido".

Preguntado acerca de se falou deste expediente co portavoz parlamentario do PSdeG, Luís Álvarez, autor do informe que o sustenta, Seco respondeu que non mantivo "ningunha comunicación" neste sentido. "Nin agora, nin tampouco anteriormente [...] á espera de, cando se abra ese expediente, poder analizar que pon o informe", manifestou.

Agarda “con toda a tranquilidade” a decisión

En canto ao ambiente entre os compañeiros do grupo parlamentario, afirmou que hai "unha situación de normalidade". "Estamos aquí escoitando os nosos compañeiros (no pleno debátese o proxecto de orzamentos para o próximo exercicio) e votaremos a favor de todas as cuestións que nos marque o grupo, como sempre fixemos", garantiu.

Seco asegurou que espera "con toda a tranquilidade" seguir traballando a favor do proxecto socialista, e deu por feito que o asunto "vaise aclarar" e que os órganos do partido acabarán apoiándolle, de forma que "van desdeñar" un expediente que, baixo o seu punto de vista, "non ten ningún sentido".

Neste punto, insistiu en que nin na súa intervención nin no voto "hai nada que xustifique" unha expulsión. Por iso, non "visualiza" saír do grupo. Ao tempo, avanzou que non prevé abandonar as "responsabilidades" que lle deron os cidadáns que lle apoiaron nas urnas e, en consecuencia, a súa acta na Cámara galega.

"Esperarei a que se dilucide o expediente", recalcou o aínda deputado do PSdeG, e aludiu que o fará tanto en relación aos órganos do partido, nos que "confía", ou de ser preciso "na xustiza ordinaria".

comentarios