O coordinador de Podemos Galicia, Antón Gómez-Reino, decidiu non reeditar o seu liderado na formación e ceder o primeiro posto da candidatura para o liderado da formación violeta no proceso de primarias no país, que xa arrincou, ao adxunto á secretaría xeral e responsábel das tarefas de Organización, Borja San Ramón.
Segundo explicaron a Europa Press fontes da formación, Gómez-Reino ostentará o terceiro posto da candidatura, denominada 'Tecer Galicia', aos órganos de dirección galegos, mentres que o cabeza de lista será San Ramón, tamén candidato á Alcaldía de Ferrol, e o segundo para a secretaria de Feminismos e de coordinación de Política Territorial, Verónica Hermida.
As citadas fontes explicaron que o actual coordinador decidiu hai un tempo non repetir á fronte de Podemos Galicia e renovar o liderado do partido, ao entender que é necesaria unha substitución xeracional. A súa percepción é que para este ciclo será preciso potenciar máis o labor territorial, algo que no seu caso é difícil de compaxinar coas súas actuais responsabilidades no Congreso, onde ademais é vicepresidente da Comisión de Exteriores —con desprazamentos frecuentes ao estranxeiro— e presidente da Comisión de Traballo.
Gómez-Reino forma parte da dirección estatal de Podemos e tamén é un cargo próximo á vicepresidenta segunda e actual líder de Unidas Podemos no Executivo, Yolanda Díaz, coa que compartiu candidatura nas eleccións ao Congreso en edicións pasadas na coalición das 'mareas'. Recentemente asegurou que a tamén ministra de Traballo é "unha referencia incontestábel" a nivel estatal e mostrouse favorábel á configuración dunha plataforma electoral que sirva para "alargar" o espazo político que na actualidade ocupa UP.
Na súa precandidatura, Borja San Ramón explica que nos últimos catro anos como responsábel de Organización actuou "da man dos círculos e a militancia, para construír un Podemos de todos e todas". "Agora dou un paso adiante para ser o coordinador autonómico do noso partido, co apoio de persoas que traballaron comigo na dirección galega, tamén co da militancia activa que se estivo deixando a pel para dar vida a Podemos Galicia nun momento político de dificultades", expuxo. A candidatura 'Tecer Galicia' está "convencida de que hai que trenzar as forzas e esperanzas para abrir unha nova etapa en Podemos Galicia" e facer "unha organización fundamental do cambio político".
Proceso de primarias
As e os militantes de Podemos Galicia están chamados a votar nas primarias para renovar a dirección do partido morado galego entre o 8 e o 14 de decembro. As votacións están previstas para a segunda semana de decembro. Tras unha campaña de seis días, arrincarán o día 8 e concluirán o 14. Un día máis tarde publicaranse os resultados do proceso, convocado despois de que o mandato da actual dirección que encabeza o deputado Gómez-Reino caducase este outono ao cumprirse catro anos desde a súa formación.
O prazo para a elaboración de documentos e a preinscrición de candidaturas ao proceso quedou aberto desde esta segunda feira. Antes de finais de novembro quedarán fechadas tanto as candidaturas como o censo da organización, que renovará o seu máximo órgano de dirección —Comité Cidadán Autonómico—, o seu coordinador a nivel da Galiza e o seu comité de garantías.
