Desproi S.L., a empresa da nave alugada polo Concello de Santiago pola que dimitiu como concelleiro de Medio Rural o socialista José Manuel Pichel, tiña unha débeda tributaria coa Administración local a principios de 2022 de 172.743,42 euros. Isto imposibilitaría a súa contratación, xa que, segundo a Lei de Contratos do Sector Público, quen teña débedas tributarias non poderá contratar coas administracións públicas.
Segundo o expediente para a compensación de débedas que abriu o Concello en xuño do pasado ano, a data do 8 de marzo, a contía identificaba a obriga principal de pagamento en 126.060 euros, mentres que os 46.683,34 euros restantes correspondían a recargas e xuros. Deste modo, o expediente abordaba a posibilidade da compensación do pagamento municipal de tres facturas a favor da empresa Desproi, por un total de 12.607 euros.
Isto é posíbel, segundo a Lei Xeral Tributaria cando unha entidade é debedora e acredora ao mesmo tempo cunha Administración. Así, en canto á compensación, deduce que a Administración local no canto de abonar o servizo contratado con esa empresa detráeo da súa débeda.
O PP acudirá á Fiscalía
O portavoz dos populares no Concello, José Antonio Constenla, insistiu en que se trata dun contrato "a dedo" e que todas as probas "chegarán á Fiscalía cando se teñan máis indicios e acceso ao informe completo". Así mesmo, engadiu que conta con máis probas "que non se poden confirmar por agora", e subliñou que estes feitos son "unha ferida aberta que necesita ser fechada con explicacións públicas".
Nesta liña, criticou que desde o Goberno de Bugallo "non facilitan os expedientes" e que parece que "para eles prevalece máis o interese socialista que o social". Constenla apuntou, despois de que o alcalde, Xosé Sánchez Bugallo, avanzase que o Concello buscaba instalacións de titularidade pública para trasladar os departamentos de Medio Rural e de Parques e Xardíns, que "non se entende que non buscasen as dependencias municipais para estes servizos hai un ano".
O BNG reclama "transparencia"
Pola súa parte, a portavoz do grupo municipal do BNG, Goretti Sanmartín, indicou que "todo apunta a que desde o Goberno local do PSOE non só se alugou a dedo unha nave vinculada a un edil", senón que a empresa "tiña débedas co Concello, o que, en condicións normais, imposibilitaría ese contrato".
Nun comunicado, Sanmartín esixiu ao Goberno de Bugallo que aclare "de forma taxativa" se esas débedas eran anteriores ou posteriores ao contrato, xa que de ser posteriores serían un feito de "extrema gravidade". Deste modo, subliñou que o primeiro que se debería facer desde o Goberno local "é achegar toda a documentación á Fiscalía", así como "deixar que se investigue todo o ocorrido". "Esta é a maneira de transparentar o acontecido para recuperar a credibilidade na institución", concluíu.
"É moi raro", di Compostela Aberta
María Rozas, portavoz de Compostela Aberta, engadiu esta terza feira após coñecer os feitos: "No caso Pichel segue faltando transparencia, cada día aparece unha dúbida nova. É moi raro que o Concello contrate unha empresa que ten débedas, cando hai xente que quedou sen bolsa de comedor por ter un recibo municipal pendente".
"Se Compostela Aberta non denunciase esta situación, o Concello seguiría pagándolle o alugueiro á empresa de Pichel. O que a veciñanza quere saber é por que se fixo este contrato, e por que ninguén se percatou de que a empresa tiña débedas. Dan unha imaxe de descontrol preocupante", apuntou, en declaracións a Onda Cero.
Bugallo afirma que retivo os pagos
O alcalde, pola súa parte, asegurou esta terza feira que Desproi non recibiu "nin un euro" por parte da Administración local, que "retivo os pagos ao notificar irregularidades". No momento en que se contratou a empresa, defendeu, este feito "non era coñecido".
