Perto de 15.000 ourensáns e ourensás votaron este 18 de febreiro por Democracia Ourensá, o partido do alcalde da cidade das Burgas, Gonzalo Pérez Xácome. Uns votos que lle outorgaron unha acta no Parlamento galego para o seu candidato Armando Oxea, algo que, para o rexedor, “é absolutamente histórico”.
“Non entraron nin Sumar nin Vox. E tampouco o fixo Ciudadanos no seu día. Polo que estamos ante algo tremendamente histórico e algo realmente impresionante”, afirmou ante os medios Xácome na noite deste domingo.
Democracia Ourensá, que aspiraba nestas eleccións ao Parlamento galego a conseguir "dous ou tres deputados" e a ser “chave e condicionar os orzamentos para conseguir salvar a provincia de Ourense”, non conseguiu o seu obxectivo.
Con todo, a entrada da formación de Xácome no Parlamento galego “vaino cambiar absolutamente todo” porque “comeza unha conta atrás”. E é que o alcalde de Ourense considera que o camiño de DO na Cámara galega será o mesmo que seguiu para chegar ao Goberno da cidade das Burgas.
“Despois de conseguir a Alcaldía de Ourense para transformar a cidade, agora a nosa idea é salvar a provincia”, dixo Xácome ante a prensa, para asegurar que ensinarán “a toda a Galiza o que se está a cocer aquí”.
“Dixemos que Ourense é a cincenta da Galiza e de España, e é certo. E hoxe comeza a reverter a historia”, concluíu o alcalde.