A portavoz municipal de Compostela Aberta, María Rozas, defendeu esta sexta feira a "diversidade" da formación á que representa e desvinculouna do proceso electoral das eleccións estatais, unha cuestión que non está, dixo, na orde do día da asemblea que teñen prevista para a semana que vén.
Con todo, sobre a relevancia de Marta Lois (candidata número dez da lista de Compostela Aberta nas municipais), no proceso de Sumar, Rozas remitiu a ela as preguntas sobre o seu futuro e destacou, en todo caso, que se trata dun "referente" para este movemento.
"Non teño moito que dicir neste momento, dentro das previsións da asemblea non está ese debate nin nada relacionado nese sentido. É certo que temos unha persoa, Marta Lois, que é unha persoa de referencia desde hai moito tempo no movemento Sumar, pero de momento ese debate non é interno en Compostela Aberta", salientou, en resposta aos medios, María Rozas.
Rozas tratou de esquivar as cuestións a este respecto, pero si dixo que ela estará "contenta sempre que os seus compañeiros e compañeiras que valora estean contentas".
"No persoal, sempre estarei contenta por ela", salientou sobre Marta Lois, que foi portavoz de Compostela Aberta e deixou este posto tras vincularse estreitamente coa plataforma de Yolanda Díaz.
“Ámbito municipalista”
María Rozas manifestou que Compostela Aberta é "unha forza de ámbito municipalista e local", que "pode ter diferentes simpatías e correntes, como é a de Marta Lois co espazo Sumar". "Pero nós estamos centrados en Santiago, ese é o noso obxectivo", sentenciou.
Díaz nas municipais
Durante a campaña electoral, a vicepresidenta segunda do Goberno español e ministra de Traballo, a ferrolá Yolanda Díaz, acudiu á tradicional pulpada das festas da Ascensión xunto aos candidatos de Compostela Aberta.
Nese acto, a política dixo sentirse identificada con esta candidatura, unha formación municipalista que irrompeu en 2015 no concello de Santiago accedendo ao bastón de mando e que “suma a todas as sensibilidades das confluencias galegas”.
