A aínda concelleira de Compostela Aberta e que agora concorreu de décima nas pasadas eleccións (sen obter acta), Marta Lois, é a persoa que figura como presidenta do partido instrumental de Sumar, Movemento Sumar, unha figura que xa asumiu cando a plataforma que impulsa a vicepresidenta segunda do Estado español, a galega Yolanda Díaz, se rexistrou inicialmente como asociación.
Así mesmo, fontes de Sumar atribúen a unha circunstancia normal este movemento, dado que a formalización do partido emula os datos que xa se presentaron á hora de inscribir a asociación.
Marta Lois é unha das persoas do contorna confianza da titular de Traballo. Yolanda Díaz xa en marzo suxeriu que a que tamén é profesora de Ciencias Políticas da Universidade de Santiago de Compostela (USC) se consolidaría como persoa de referencia do proxecto.
Neste sentido, Marta Lois é un dos nomes que xa empezaron a soar na Galiza como posíbel integrante das listas que poida pactar o espazo 'rupturista' para as eleccións estatais do próximo 23 de xullo como muller de confianza de Díaz.
Partido político
Sumar xa está rexistrado como partido político para as eleccións estatais, co obxectivo de “facilitar a confluencia entre as distintas formacións de esquerda e a sociedade civil”.
Desta forma, a denominación concreta formalizada no Ministerio do Interior é 'Movemento Sumar' e que a fórmula de partido instrumental serve para "poder garantir a participación de persoas independentes e profesionais na confluencia", indican desde o colectivo conformado pola titular de Traballo.
Nesta liña, as citadas fontes indican que Sumar ten como meta "ser a casa grande da democracia", para erixirse como un "movemento europeísta, plural" e con firme vontade de "enfrontar o reto da emerxencia climática e avanzar cara a unha sociedade máis libre, máis feminista e máis igualitaria".
Os prazos da normativa electoral fixan un período de dez días para constituír as coalicións para a cita coas eleccións estatais, polo que Sumar e a vicepresidenta segunda aceleraron o proceso para conformar unha fronte ampla progresista.
