POLÍTICA

O BNG reivindica un tren de proximidade "do século XXI"

O BNG reivindica un tren de proximidade "do século XXI"

O Bloque Nacionalista Galego denunciou esta segunda feira "un abandono" do tren na Galiza que afecta á mobilidade, á economía e ao día a día da cidadanía, nomeadamente á que vive fóra do Eixo Atlántico. A formación nacionalista responsabiliza o Estado e a "inacción" da Xunta desta situación, e propoñen varias medidas para revertela: investimentos, recuperación de frecuencias e asunción de competencias.
Néstor Rego e A
photo_camera Néstor Rego e Ana Pontón, esta segunda feira, na súa "viaxe reivindicativa en tren (Foto: Nós Diario).

Unha nutrida representación do BNG, coa súa portavoz nacional, Ana Pontón, á fronte, subiu a primeira hora desta segunda feira ao tren que cubre a liña entre Ferrol e A Coruña. Unha "viaxe reivindicativa", como indicaron os propios nacionalistas, para demandar un tren de proximidade "do século XXI que comunique as vilas e cidades da Galiza con horarios, duración de traxectos e prezos competitivos e adaptados ás necesidades de traballo, de xestións, de estudo ou de lecer da cidadanía".

Pontón, que estivo acompañada do deputado no Congreso Néstor Rego, alcaldes e alcaldesas e responsábeis municipais e comarcais do Bloque, manifestou que para as persoas usuarias desta liña "é case misión imposíbel usar este medio de transporte habitualmente pola falta de horarios, duración dos traxectos e mesmo o prezo dos billetes”.

O BNG incidiu en que a imposibilidade de usar o tren como medio habitual para viaxar de Ferrol-A Coruña, e viceversa, non é un caso illado, apuntando que fóra do Eixo Atlántico a opción do ferrocarril para desprazarse pola Galiza  "non é funcional debido á falta de investimentos e o progresivo desmantelamento", situación da que responsabiliza o Estado e a "inacción" da Xunta de Núñez Feixoo.

Ao contrario que en Europa

“Este abandono do tren na Galiza ocorre mentres nos países europeos da contorna é o transporte do presente e do futuro porque reduce emisións, é máis barato e máis sostíbel”, denunciou Pontón. A portavoz expuxo as propostas nacionalistas para reverter esta situación. 

Así, no plano inmediato situou dúas medidas: recuperar todas as frecuencias suprimidas durante a Covid e recuperar o tren Avant das 6:30 horas da Coruña a Ourense.

No medio prazo, propón un "plan de compensación" para o sistema ferroviario que permita actualizar e modernizar todas as vías en servizo, con horarios, maquinaria e prezos competitivos. Igualmente, transferir á Galiza as competencias en materia de ferrocarril interior, "como xa teñen Euskadi, Catalunya, Valencia ou Andalucía". 

O propio Parlamento galego aprobou por unanimidade esta transferencia, "mais Feixoo non moveu un dedo para conseguila en 12 anos", explicou. 

Finalmente, para a xestión dun ferrocarril de proximidade propuxo a creación dun ente ferroviario propio, o 'Galtren'.

Lugo tamén "circulou" 

O pasado mes de decembro, e coincidindo coa "viaxe inaugural" do AVE á Galiza, unha delegación de representantes e cargos BNG de Lugo viaxou en tren desde esta cidade até A Coruña para demandar melloras na rede de proximidade para "unha vertebración" que realmente permita "viaxar" en condicións acaidas entre "as cidades galegas".

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios