O alcalde socialista e candidato á reelección en Vigo, Abel Caballero, consolidaría a súa maioría absoluta e volvería arrasar nas eleccións do vindeiro 28 de maio, conseguindo para a súa lista entre 18 e 21 concelleiros e concelleiras —en 2019 logrou 20 asentos— dun total de 27, segundo o avance de resultados da enquisa preelectoral do CIS, publicada esta quinta feira e que tamén lle outorga unha valoración de 7,11 puntos sobre 10 por parte das persoas enquisadas.
Na cidade olívica, o Centro de Investigacións Sociolóxicas realizou 815 entrevistas entre o 10 e o 26 de abril, e máis da metade (51,5%) das persoas trasladaron a súa intención de votar (voto directo) o PSdeG-PSOE nas próximas eleccións municipais. O seguinte partido nese ranking é o PP, a quen prevé votar 9,9% dos enquisados, seguido moi de perto polo BNG, a quen votarán 9,6% dos vigueses e viguesas —sempre segundo o CIS—, mentres que o voto á Marea queda en 6%.
PP e BNG disputan a segunda praza
En canto á estimación de voto, segundo o CIS, o PSOE de Caballero obtería entre 18 e 21 edís e unha estimación de 65,6% do voto válido emitido; o PP tería entre 3 e 5 representantes —agora ten 4— e 14,8 % do voto; o BNG, entre un e 3 concelleiros —hoxe ten un— e 9% do voto, e Marea de Vigo, que ten agora 2 edís, ficaría entre mantelos e non obter ningunha representación, con 6,3 % do voto estimado. O resto de formacións políticas ficarían fóra do consistorio.
Valoración de candidatos
A respecto da valoración dos líderes políticos, Abel Caballero obtén para os enquisados unha nota media de 7,11; ademais, 78,5 % cualifica a súa xestión como alcalde no último ano entre "boa" e "moi boa", mentres que algo máis de 16 % cualifícaa como "mala" ou "moi mala".
Do resto de líderes políticos, o único que consegue o aprobado, á marxe do rexedor, é o concelleiro e candidato do BNG, Xabier Pérez Igrexas, cunha nota de 5,03. A candidata do PP, Marta Fernández-Tapias, obtén unha nota media de 4,37, mentres que a nota media de Rubén Pérez, de Podemos-Marea de Vigo, é de 4,73.
Nesta enquisa, máis de 50% das persoas entrevistadas afirmou que, á hora de votar nunhas eleccións municipais, o candidato ou candidata á Alcaldía é o que máis lle importa, mentres que o 34,6% considera máis importante o programa e só 11,1% dá a maior importancia ao partido político.
Con todo, o CIS explica que este estudo preelectoral contén estimacións que "non son en ningún caso unha predición de resultados", senón que deben entenderse como unha "diagnose e medición aproximada do apoio electoral potencial".
Estimación das autonómicas
Nesta mesma enquisa do CIS inclúese unha estimación do que podería acontecer nas eleccións autonómicas convocadas en diferentes territorios do Estado tamén para o 28 de maio. En termos xerais, o PSOE sumaría 31,7% dos apoios na suma estatal, mentres o PP obtería 27,3%. A extrema dereita de Vox lograría entrar en todos os parlamentos en disputa —todos agás os da Galiza, Euskadi, Catalunya, Andalucía e Castela e León—.