catamontrear.- Andar ao tolo, como as cabras.
Exemplo.- “Este rapaz non fai máis ca catamontrear.”
Lugar de escoita.- Quireza (Cerdedo-Cotobade).
Fonte.- María Asunción Álvarez Touriño.
colimaia/colimaiada.- Fato de trastes, chusma, caninea, gandallada.
Lugar de escoita.- Corme (A Coruña).
Fonte.- Xulio López Valcárcel.
de debaixo da cama (ser un xan).- Expresión apostilada para a coñecida definición popular de quen non é moi espelido e carece de carácter (xan).
Lugar de escoita.- Cuntis.
Fonte.- Marcos Seixo.
espurrida/o.- (Ademais de significados xa rexistrados) Persoa mal comedora.
Exemplo.- “É tan espurrida que non sei que lle vou dar de comer.”
Lugar de escoita.- Sober.
Fonte.- Ramón Sandoval.
faltar unha tella.- Escasearlle a intelixencia a unha persoa.
Exemplo.- “A ese rapaz fáltalle unha tella.”
Lugar de escoita.- Santa María de Taboexa (As Neves).
Fonte.- María Isabel Fernández Vidal.