A Real Academia Galega (RAG) e a Fundación Barrié abriron esta segunda feira a campaña para a elección popular da 'Palabra do Ano 2023', na que se poderá participar desde hoxe mesmo e até o domingo 10 de decembro. Desta fase de suxestións, que promoven tanto a Academia como a Fundación Barrié desde o ano 2014 a través da web para a difusión do léxico galego 'Portal das Palabras' —nesta ligazón—, sairán os vocábulos finalistas que serán levados a votación popular entre a terza feira 12 de decembro e a segunda 25, día de Nadal.
Esta campaña pretende identificar voces que incidan en cuestións destacadas da conversación pública do último ano, que o sinteticen ou estean relacionadas con algún novo fenómeno ou preocupación. En ocasións, estas palabras poden ser neoloxismos, pero tamén poden estar presentes na lingua desde tempo atrás, e permiten "despedir simbólicamente o ano e recibir o que está a piques de comezar".
O proceso para a elección da 'Palabra do Ano' consta de tres fases, no que as que as persoas que participen serán a máxima autoridade. A primeira, que se atopa agora mesmo aberta, céntrase na elección de vocábulos; a segunda, do 12 ao 25, someterá a votación temática os termos máis significativos e repetidos da primeira fase, e na terceira, após as festas de Nadal, darase a coñecer a palabra gañadora.
Nas edicións anteriores foron elixidas 'comadre' (2022), 'tanxugueiras' (2021), 'nós' (2020), 'sentidiño' (2019) 'deseucaliptización' (2018), 'afouteza' (2017), 'irmandade' (2016) —coincidindo co centenario das Irmandades da Fala—, 'refuxiado, -a' (2015) e 'corrupción' (2014).