'Marcha pola dignidade': A loita contra a deturpación dos topónimos volve á Toxa
"O sábado día 16 ás 12 horas voltaremos á ponte da Toxa polo seu nome e por todos os que queren eliminar". Así anunia A Mesa a mobilización que esta fin de semana decorrerá neste punto da Ría de Arousa na defensa dos topónimos galegos, os únicos legais.
O pasado 29 de setembro a Garda Civil impediu a un grupo de activistas da Mesa pola Normalización Lingüística protestaren pola "barbarización do nome da Illa da Toxa" polo Foro de La Toja, organizado pola empresa Hotusa e que contou coa participación de altos representantes do Estado e goberno españois e da Xunta de Galiza.
O nome dun lugar identifícao, xunto con outros moitos aspectos, como parte do país ao que pertence. Borrar o seu nome é borrar todo o que está vinculado a el e as referencias que o sitúan
"Á empresa hoteleira vén de lle ser concecida unha achega pública de 241 millóns de euros, o que non serviu polo momento para que utilice a única forma legal e lexítima da Toxa e nen tan sequera para que as autoridades públicas reclamen da empresa que cumpra a legalidade", sinalan desde a organización pola defensa da lingua.
Pola contra a representación do Goberno español "só quixo evitar unha concentración que reclamaba o cumprimento da escasa lexislación que ampara o galego, nomeadamente o artigo 10.1 da LNL: “os topónimos de Galiza terán como única forma oficial a galega”.
O caso da Toxa non é o único de deturpación toponímica
"O nome dun lugar identifícao, xunto con outros moitos aspectos, como parte do país ao que pertence. Borrar o seu nome é borrar todo o que está vinculado a el e as referencias que o sitúan. Renomealo é faltar á dignidade de quen lle deu nome e existencia", manifesta A Mesa..
O caso da Toxa non é o único de deturpación toponímica, lembran. Cada día é máis habitual por parte de entidades e institucións públicas nunha actitude que "alenta a deformación dos nomes de lugar por parte de algunhas empresas, mesmo da relevancia de Google na nomenclatura do seus mapas".