Hotusa impulsa o Foro da Toxa após recibir 241 millóns

A firma do empresario chantadino Amancio López Seijas vén de obter financiación do fondo de rescate do Goberno español por valor de 241 millóns de euros.
Autoridades na inauguración do Foro da Toxa (Foto: Álvaro Ballesteros / Europa Press).
photo_camera Autoridades na inauguración do Foro da Toxa (Foto: Álvaro Ballesteros / Europa Press).

O Foro de La Toja, co topónimo da illa da Toxa (O Grove) deturpado, deu comezo á súa segunda edición, que se desenvolve entre os días 29 de setembro e 1 de outubro e á que está previsto que asistan numerosos persoeiros dos ámbitos da política e a economía. 

Hotusa, a firma hoteleira do empresario chantadino Amancio López, líder do sector na Galiza, é a impulsora deste evento, no que están citados, entre outros, os ex presidentes do Goberno español Mariano Raxoi e Felipe González, a vicepresidenta primeira do Goberno, Nadia Calviño; o ministro de Asuntos Exteriores, José Manuel Albares; o exministro de Asuntos Exteriores de Israel  Shlomo Ben  Ami; o  excomisario europeo Miguel Arias  Cañete, e empresarios como o presidente de Iberdrola, Ignacio Sánchez Galán; o de Abanca, Juan Carlos Escotet, ou o CEO de Hijos de Rivera, Ignacio Rivera.

A dixitalización, o emprego e o cambio climático serán algúns dos temas que abordarán as persoas asistentes a estas xornadas. Todo nunha cita "consolidada" que, como apuntan desde a organización, defende os valores atlánticos, baseados en cuestións como o libre mercado e a democracia representativa, que o seu presidente, o ex ministro Josep Piqué, contrapón co que sucede en países como Afganistán e cos riscos dos populismos.

A firma hoteleira celebra este certame, no que os contactos entre empresas e políticos están á orde do día, após recibir luz verde para a concesión dun préstamo participativo por impor de 190 millóns de euros por parte da Sociedade Estatal de Participacións Industriais (SEPI) e outro ordinario de 51 millóns de euros, ambos os dous con cargo ao Fondo de Apio á Solvencia de Empresas Estratéxicas creado polo Goberno español para rescatar empresas sistémicas golpeadas pola crise da Covid. 

Na tramitación do expediente a SEPI tivo en conta o "carácter estratéxico" do grupo hostaleiro dentro do sector turístico, xa que está presente en 17 países con 219 estabelecementos, 67% no Estado español, e 4.085 empregadas en decembro de 2019. 

Porén, a crise ocasionada pola Covid impactou nas contas do grupo, que por primeira vez nos seus máis de 40 anos de historia fechou o pasado exercicio sen declarar beneficios.

Comentarios