Ministros de Exteriores de varios países árabes e de Turquía pediron en persoa ao secretario de Estado dos Estados Unidos de América (EUA), Antony Blinken, que adopte un papel máis "amplo" na guerra de Gaza a través do incremento da presión ao seu gran aliado, Israel, para que acepte un cesamento do fogo.
A petición foi formulada dentro do chamado Cume Conxunto Árabe-Islámico que se está desenvolvendo en Qatar, coa asistencia de Blinken, un día despois de que os EUA quedasen illados no seu veto a unha resolución do Consello de Seguridade da ONU a favor un cesamento de hostilidades inmediato.
Blinken recibiu esta petición dos seus homólogos de Qatar, Arabia Saudita, Xordania, Exipto, Palestina e Turquía, quen avogou por un "papel máis amplo" dos Estados Unidos "na presión sobre a ocupación israelí para lograr un cesamento do fogo inmediato".
Os asistentes, excepto Blinken, "expresaron tamén a súa decepción polo fracaso do Consello de Seguridade da ONU, por segunda vez, á hora de votar unha resolución para un cesamento do fogo inmediato na Franxa de Gaza por razóns humanitarias, despois de que Estados Unidos utilizase o seu poder de veto".
Así mesmo, e segundo o comunicado publicado en Twitter polo Ministerio de Exteriores de Qatar, "os membros do comité ministerial renovaron a súa posición unificada sobre o seu rexeitamento á continuación de operacións militares por parte das forzas de ocupación israelís na Franxa de Gaza, renovando o seu chamado á necesidade dun cesamento do fogo inmediato e completo".
Por último, "reiteraron a súa énfase en crear un clima político real que conduza a unha solución de dous Estados e o estabelecemento dun Estado palestino segundo as liñas do 4 de xuño de 1967, de conformidade coas normas internacionais pertinentes".
