mércores 27/10/21

O PP recorre aos indultos para non renovar o Poder Xudicial

Unha semana despois de facerse pública a intención do Goberno do Estado español de tratar o indulto ás presas e presos políticos cataláns continúa a ofensiva da dereita encabezada polo PP, que se nega a negociar a renovación do Consello Xeral do Poder Xudicial. O órgano atópase en funcións desde hai case 30 meses.

Cuca Gamarra, voceira do PP no Congreso, a semana pasada no lexislativo. (Foto: E. Parra. POOL / Europa Press)
Cuca Gamarra, voceira do PP no Congreso, a semana pasada no lexislativo. (Foto: E. Parra. POOL / Europa Press)

Cando están a piques de facerse 30 meses cun Consello Xeral do Poder Xudicial (CXPX) en funcións, ao non poder acordarse a súa renovación no Congreso, o Partido Popular fecha a porta a calquera opción de pacto co PSOE valéndose da posibilidade de que o Goberno do Estado aprobe os indultos ás presas e presos políticos cataláns.

O acordo entre os partidos estatais é imprescindíbel para alcanzar a maioría reforzada de tres quintos en Congreso e Senado precisa para renovar o órgano de Goberno das xuízas e xuíces.

A semana pasada, cargos institucionais e orgánicos do PP xa sinalaban que de saír adiante os indultos sería moi difícil que se volvesen sentar con Pedro Sánchez para negociar sobre o poder xudicial e hoxe foi Cuca Gamarra, voceira do PP no Congreso, quen confirmou que de ser así “sen dúbida ningunha” paralizarán a renovación, co cal o Consello Xeral do Poder Xudicial actual podería seguir até 2024 -as eleccións serían a finais de 2023-, superando os cinco anos en funcións.

Nunha entrevista, Gamarra apuntou que cos indultos estaríanse “rompendo as regras do xogo e ademais estase a pasar unha liña vermella”. 

Instan o CXPX a dimitir en bloque

Pola súa banda, a asociación xudicial Xuízas e Xuíces para a Democracia instou os membros do Consello Xeral do Poder Xudicial a que dimitan en bloque para obrigar á renovación do órgano.

Na solicitude, a entidade acusou o PP das rupturas dos intentos anteriores de negociación, utilizando “variadas e inxustificábeis escusas” para erguerse da mesa, indican, como vetar a participación de Unidas Podemos no diálogo, facer o mesmo con algunha das candidatas e candidatos a entrar no Consello e xa na terceira ocasión polas eleccións en Catalunya e Madrid.

Ademais, defenden que cando a renovación dun órgano constitucional se adía moito no tempo, “incorre nunha fraude institucional que debilita o seu funcionamento" correcto.

comentarios