"Xustiza", clamaron na terza feira, 25 de febreiro, membros da Plataforma en defensa do Memorial do cemiterio do Leste de Madrid, durante o desenvolvemento do pleno do concello da capital do Estado español. Ademais, tamén exixiron a dimisión do alcalde da cidade, o popular José Luis Martínez-Almeida.
Activistas desta plataforma en defensa da memoria histórica irromperon mentres se desenvolvía o pleno municipal co obxectivo de denunciar o desmantelamento do memorial do cemiterio madrileño. Dos muros deste recinto, e por orde de Almeida, borráronse todos os nomes gravados das persoas asasinadas polo franquismo desde o Golpe de Estado de 1936.
A iniciativa partira do anterior Goberno municipal da alcaldesa Manuela Carmena. Durante a protesta de onte no pleno lanzáronse pasquíns co poema do poeta Miguel Hernández, o cal vén de ser borrado do memorial tamén por orde do Goberno madrileño de coalición PP-Cs, sustentado pola ultradereita de Vox.
No pleno de onte debateuse ademais unha proposición de condena do franquismo que, pese á negativa de Ciudadanos, PP e Vox a apoiala, saíu adiante cos votos das formacións progresistas.