O Tribunal Xeral da Unión Europea (TXUE) anulou esta cuarta feira as sancións do bloque comunitario contra o empresario ruso Mikhail Fridman, antigo dono dos supermercados Dia a través da súa ferramenta de investimento Letterone, ao entender que as medidas non estaban suficientemente xustificadas.
A Xustiza da Unión Europea (UE) atendeu así os recursos de Fridman e do tamén empresario Petr Aven contra a súa inclusión na 'listaxe negra' da UE pola relación de Alfa Group, un conglomerado que inclúe Alfa Bank, un dos principais bancos de Rusia, coa invasión rusa de Ucraína.
Ambos alegaron que as sancións non se baseaban en probas "fiábeis nin críbeis" e que as apreciacións do Consello Europeo eran erróneas para aplicar sancións polo ataque ruso ao territorio ucraíno.
O tribunal con sede en Luxemburgo declarou que ningún dos motivos que figuran nas sancións contra Fridman e Aven estaba suficientemente acreditado e que os Estados da UE non achegaron probas adicionais.
Sen xustificación das sancións
Así, o bloque comunitario careceu de xustificación para as sancións e a renovación das medidas contra estes dous cidadáns rusos. Por este motivo, o TXUE anulou tanto as sancións iniciais como os actos de renovación das medidas restritivas.
A xuízo do TXUE, a UE sinalou certa proximidade de ambos os empresarios co presidente de Rusia, Vladimir Putin, ou coa súa contorna. Porén, non quedou probado que teñan apoiado ou patrocinado a campaña militar rusa contra Ucraína.
