Israel reduce a menos de 24 horas o seu ultimato para abandonar Gaza a pesar da advertencia da ONU: "É imposíbel"

Israel deu esta sexta feira un prazo de 24 horas para que máis dun millón de persoas que se atopan na zona norte da Faixa de Gaza abandonen o territorio. Un ultimato que remataría na madrugada do sábado. As Nacións Unidas (ONU) consideraron que un movemento de persoas desta proporción é "imposíbel" sen "consecuencias humanitarias devastadoras", asegurou o portavoz da organización Stéphane Dujarric. Porén, no canto de dar marcha atrás, Israel decidiu recortar o prazo, até as 20 horas desta sexta feira (unha hora menos na Galiza). Israel prepara unha invasión e dá 24 horas para desaloxar un millón de persoas nunha Gaza asediada e sen subministros A ONU, explicou, fai un "firme chamamento" a que esta orde "sexa rescindida para evitar que un contexto que xa é unha traxedia se converta nunha situación desastrosa". Ademais, o Fondo das Nacións Unidas para a Infancia (Unicef) reclamou un cesamento do fogo "inmediato" e advertiu tras o ultimato dado por Israel en Gaza que non hai "ningún lugar seguro" ao que se poida fuxir en previsión dunha anunciada ofensiva terrestre. Mesmo o portavoz do Consello de Seguridade Nacional dos Estados Unidos, Jon Kirby, afirmou que a evacuación que propuxo Israel en tan só 24 horas é unha "tarefa difícil". A respecto deste ultimato, o presidente de Rusia, Vladimir Putin, advertiu que unha ofensiva terrestre das forzas israelitas sobre a Faixa de Gaza implicaría unha cifra de vítimas "absolutamente inaceptábel" entre a poboación civil. A pesar das alertas emitidas pola ONU e por Unicef, e das opinións vertidas por potencias como os EUA ou Rusia, a Comisión Europea reiterou o seu apoio a Israel e avalou o prazo que deu para abandonar a Faixa de Gaza. "Os civís deben ser avisados e postos en alerta antes de operacións militares para permitirlles saír e iso é o que Israel fixo", sinalou esta sexta feira o portavoz da Comisión Europea, Eric Mamer. Non obstante, Bruxelas mudou a súa posición horas despois. O Alto Representante da Unión Europea (UE) para Política Exterior, Josep Borrell, afirmou como "totalmente irreal" a posibilidade de evacuación proposta por Israel. "Deben ser alertadas [as persoas de Gaza] de operacións militares para que poidan marchar, mais esas advertencias deben ser realistas", criticou. Uso de armas químicas A ONG Human Rights Watch (HRW) denunciou que o Exército de Israel está empregando fósforo branco nas súas operacións militares tanto na Faixa de Gaza como en Líbano. A organización alertou do risco do seu uso para a poboación civil. Siria denuncia que Israel realizou un ataque aéreo aos aeroportos de Damasco e Alepo "Cada vez que se emprega fósforo en zonas civís poboadas, xérase un alto risco de queimaduras insoportábeis e sufrimento de por vida. O fósforo branco é ilegalmente indiscriminado cando se fai estalar en zonas urbanas poboadas, onde pode queimar casas e causar danos atroces a civís", dixo a directora de HRW para Oriente Medio e o norte de África, Lama Fakih. A ONG sinalou que ten probas de que Israel empregou este tipo de armas cando menos a terza feira no Líbano e a cuarta feira en Gaza ao verificar vídeos que amosan múltiples refachos de fósforo branco disparados con artillaría contra o porto de Gaza e contra zonas rurais do Líbano. Non obstante, o Exército de Israel cualificou as acusacións de "rotundamente falsas". A última hora da tarde, o Exército de Israel atacou un convoi de persoas desprazadas palestinas, deixando 70 mortes. Neste contexto, perto de 2.000 persoas morreron en Gaza desde que comezou o conflito a pasada semana, segundo o último balance do Ministerio de Saúde palestino, mentres que a parte israelita sufriu xa 1.300 falecementos, segundo as autoridades deste Estado. Ademais, o número de persoas desprazadas dos seus fogares no territorio da Faixa de Gaza supera as 423.000. O presidente da Autoridade Palestina, Mahmud Abbas, alertou de que un desprazamento masivo de poboación podería levar a unha "segunda Nakba", nome empregado para referirse ao éxodo de 760.000 palestinos en 1948. Abbas, que se reuniu esta sexta feira co secretario de Estado dos EUA, Antony Blinken, rexeitou o uso de "prácticas abusivas" contra civís por ambas as partes. Ademais, defendeu que a "seguridade e a paz lógranse dando ao pobo palestino os seus dereitos lexítimos", así como a necesidade de acabar co conflito, reivindicando a solución de dous Estados "coas fronteiras de 1967". Escalada a outras frontes O ministro de Exteriores do Irán, Hosein Amirabdolhian, reuniuse esta sexta feira en Beirut co líder do partido-milicia do Líbano Hezbolá, Hasán Nasralá, e advertiu de que, se Israel non pon fin aos "crimes de guerra", pode abrirse unha nova fronte de conflito na fronteira libanesa. O asedio de Israel deixa Gaza sen luz ante o inminente ataque militar de forzas terrestres Amirabdolahian non descartou que a guerra poida expandirse. "Por suposto, no caso de que continúen os crimes de guerra e o bloqueo humanitario de Gaza e de Palestina, calquera posibilidade por parte da resistencia [eixo formado por grupos palestinos, Hezbolá, Irán e Siria] é posíbel", afirmou o ministro. Neste sentido, o secretario xeral adxunto de Hezbolá, Naim Qassem, asegurou a participación da organización libanesa no conflito "de acordo aos nosos plans e segundo os nosos termos, ao seu debido tempo". A tensión nesta fronteira aumenta tamén a nivel de Estado, pois o Exército libanés denunciou que as forzas israelitas destruíron un dos seus puntos de observación en Dahaira, ao sur dun país en que, como noutros moitos do mundo árabe, miles de persoas saíron esta sexta feira ás rúas para apoiar o pobo palestino. Pola súa parte, o secretario xeral da ONU, António Guterres, alertou do risco dunha escalada do conflito a raíz dos ataques perpetrados por Israel contra os aeroportos sirios de Alepo e Damasco, que cualificou de "extremadamente preocupantes". Morte en Cisxordania A tensión é cada vez maior en Cisxordania, onde as operacións das forzas israelitas se saldaron esta sexta feira coa morte de polo menos 11 palestinos. O Ministerio de Sanidade palestino ten rexistrados xa máis de 40 falecementos a mans de colonos ou do Exército israelita desde o sábado.