Ducias de milleiros de persoas participaron hoxe na capital arxentina, Bos Aires, na mobilización convocada polas forzas sindicais encabezadas pola Confederación Xeral do Traballo (CXT), á que se sumaron organizacións sociais, en contra do decreto sancionado polo presidente, o ultradereitista Javier Milei, co que modificou máis de 300 normas acabando con boa parte da lexislación de protección social e abrindo a porta á privatización de empresas públicas.
O documento acordado polos sindicatos incide en que a “feroz reforma laboral regresiva” está baseada en medidas “arbitrarias, anticonstitucionais e lesivas dun vasto número de dereitos civís, comerciais e sociais”.
Dous dos líderes da CXT, Héctor Daer e Pablo Moyano, reiteraron que hai que acabar coa norma “na política, na Xustiza e nas rúas”, nunha marcha que se dirixiu ao Palacio de Xustiza para apoiar a presentación de recursos de inconstitucionalidade contra o decreto de necesidade e urxencia, unha forma legal para circunstancias extraordinarias e que aínda pode ser freada no lexislativo, para o que ambas as dúas Cámaras deberán rexeitalo.
Durante a protesta, transcendeu que o xuíz Ignacio Ramonet rexeitou as medidas provisorias reclamadas pola CXT para suspender a vixencia dos artigos do decreto que fan referencia a temas laborais, defendendo que aínda non entrou en vigor, algo que acontecerá a sexta feira.
A dirección do sindicato reúnese hoxe para desenvolver un plan de loita contra o decreto, que a axencia Télam apunta que podería incluír unha folga xeral. A pesar diso, nunha xuntanza horas antes entre as forzas sindicais e lexisladores da progresista Fronte de Todos, o deputado Hugo Yasky subliñou que a greve non estaba sobre a mesa polo de agora.
En todo caso, Milei asegurou que se o lexislativo rexeita o decreto convocará “un plebiscito ou consulta popular”. Porén, a única vía para convocar unha votación vinculante é por medio do Congreso.
Poder adquisitivo
Asemade, tras o despido de 7.000 funcionarias e funcionarios e a revisión de 65.000 contratos máis, anunciou que non haberá aumentos de salario no curto prazo para os empregados públicos que manteñan o traballo, xerando unha perda significativa do seu poder adquisitivo despois de desvalorizar o peso arxentino e a pesar de que admitiu que as súas políticas neoliberais implicarán un aumento da inflación, que xa se sitúa en 160%.